07.10.2026 | 23:48
Արթուր Դանիելյանը կալանավորվեց
Ավինյանն առաջարկում է Կինոյի տան դիմացի պուրակն անվանակոչել «Նռան գույնը»
Քաղաքականություն
04.09.2024 | 21:20
Երևանի ավագանու սեպտեմբերի 10-ի հերթական նիստի օրակարգում ընդգրկված 29 հարցերից մեկը Երևանի քաղաքապետ Տիգրան Ավինյանի ներկայացրած նախագիծն է։ Այս մասին Factor.am-ը տեղեկանում է քաղաքապետարանի կայքէջից։
Դրանով Տիգրան Ավինյանն առաջարկում է Կենտրոն վարչական շրջանի Կինոյի տան դիմացի պուրակն անվանակոչել Սերգեյ Փարաջանովի «Նռան գույնը» ֆիլմի անվամբ՝ «Նռան գույնը» պուրակ:
«Սերգեյ Փարաջանովի նշանավոր «Նռան գույնը» ֆիլմը թողարկվել է 1968թ. և նվիրված է Սայաթ-Նովային, հեղինակային անունը՝ «Սայաթ-Նովա»։ Գրաքննության ճնշման տակ Փարաջանովը ստիպված էր վերամոնտաժել և փոխել ֆիլմի անունը։ Այն տարբերակը, որը ցուցադրվել է էկրաններին, Սերգեյ Յուտկևիչի իրականացրած ևս մի վերամոնտաժի արդյունքն է։ «Նռան գույնը» կինոնկարում միավորված է «երեք ժամանակ»` ֆիլմի հերոսի` միջնադարյան հայ աշուղ Սայաթ-Նովայի ժամանակը, ֆիլմի հեղինակի` Փարաջանովի ապրած ժամանակը և հավերժական ժամանակը: Նռան գույնը` փարաջանովյան «կինեմատոգրաֆիական գորգի» գերիշխող այդ գույնը, հայի ոչ այնքան կենցաղի, այլ առավելապես տրանսցենդենտ` անդրանցումային կեցության ծնունդ որդան կարմիրն է` հավերժությունից կորզված, իբրև կյանքի բանաձև ու նախատվյալ գտնված, սրբագործված գունային տեսանելի սուբստանցիան»,- ասված է քաղաքապետի հեղինակած նախագծի հիմնավորման մեջ։
Ի դեպ, ավագանու առաջիկա նիստին նախագիծը չի քննարկվի, քանի որ չզեկուցվող հարցերի շարքում է։
Արփի Հակոբյան
