15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Ամիրյան փողոցն անվանափոխել Պապ թագավորի անունով, Լենինգրադյանը՝ Բեկոր Աշոտի․ ավագանու անդամը նախագիծ է ներկայացրել
Հասարակություն
04.09.2024 | 20:58
Երևանի ավագանու սեպտեմբերի 10-ի հերթական նիստի օրակարգում 29 հարց է ընդգրկված։ Քաղաքապետարանի կայքից Factor.am-ը տեղեկանում է, որ որոշման նախագծերից մեկով ավագանու ընդդիմադիր «Ազգային առաջընթաց» խմբակցության անդամ Հայկ Գրիգորյանն առաջարկում է Կենտրոն վարչական շրջանի Արսեն Ամիրյան փողոցն անվանափոխել Պապ թագավորի անունով՝ «Պապ թագավոր փողոց»։
«Հայոց պատմության մեջ ամենաերիտասարդ թագավորներից մեկը՝ Պապը, իր կարճաժամկետ գահակալության ընթացքում հասցրեց այնքան և այնպես գործել, որ այսօր արդեն նրա անունը դասվում է հայոց ամենանշանավորների շարքում։ Նա նորարար էր, ու ինչպես պատահում է բոլոր նորարարների հետ, նրան էլ շատերը չընդունեցին, չսիրեցին»,- ասված է ավագանու ընդդիմադիր անդամի հեղինակած նախագծի հիմնավորման մեջ։
Ուշագրավ է, որ ամիսներ առաջ էլ Գրիգորյանն առաջարկում էր Ամիրյան փողոցն անվանափոխել Արցախյան ազատամարտի մասնակից, Արցախի հերոս, «Մարտական խաչ» առաջին աստիճանի շքանշանակիր Աշոտ Ղուլյանի (Բեկոր Աշոտ) անունով։ Այժմ էլ նա առաջարկում է Աշոտ Ղուլյանի անունով անվանափոխել Լենինգրադյան փողոցը, որը սկսվում է Կիևյան կամրջից և ավարտվում Հասրաթյան-Սարգսյան խաչմերուկում։ Իսկ Ամիրյան փողոցը սկսվում է Հանրապետության հրապարակից՝ հասնելով մինչև Սարյան փողոց։
Նշենք, որ հրապարակախոս Արսեն Ամիրյանը եղել է բոլշևիկյան հեղափոխական, Բաքվի 26 կոմիսարներից։
Արփի Հակոբյան
