Նորայր Փանոսյանի գործը մակագրվել է դատավոր Արման Հովհաննիսյանին

Սահմանադրական դատարանի դատավոր Հրայր Թովմասյանի սանիկ Նորայր Փանոսյանի գործը մակագրվել է դատավոր Արման Հովհաննիսյանին։ Այս մասին տեղեկությունը հաստատեցին դատարանից։

Այս գործի մակագրման վերաբերյալ տեղեկությունը պետք է հասանելի լիներ «Դատալեքս » դատական տեղեկատվական համակարգում, բայց արդեն երկու ամսից ավելի է՝ այն խափանված է, քանի որ սերվերի վրա կոյուղաջուր է լցվել․ համակարգ մուտքագրված նոր գործերը չեն երևում։

Գործով առաջին դատական նիստը նշանակվել է սեպտեմբերի 9-ին, բայց, չի բացառվում, որ նախնական դատալսումների փուլում, անդրադառնալով գործի ընդդատության հարցին, այսինքն՝ այն հարցին, թե որ դատարանը պետք է քննի Փանոսյանի գործը, դատավորը որոշի այն ուղարկել Հակակոռուպցիան դատարան։
Հարցն այն է, որ Փանոսյանին վերագրվում է կոռուպցիոն հանցագործություն, իսկ այսպիսի հանցագործությունները քննում է Հակակոռուպցիոն դատարանը։

Հիշեցնենք, որ մոտ 4․5 տարի քննելուց հետո Երևանի քրեական դատարանի դատավոր Տաթևիկ Գրիգորյանը որոշել է Նորայր Փանոսյանի գործն առանձնացնել Հրայր Թովմասյանի գործից՝ պատճառաբանելով, որ Փանոսյանի՝ առողջական խնդիրների պատճառով նիստին պարբերաբար չներկայանալու պայմաններում խախտում է գործի քննության ողջամիտ ժամկետը։

Սակայն հարկ է նկատել, որ ողջամիտ ժամկետում գործի քննության իրավունք ունի ոչ միայն Հրայր Թովմասյանն, այլ նաև Նորայր Փանոսյանը, մինչդեռ գործից մաս անջատելու որոշումը հանգեցրել է իրավիճակի, որ 4․5 տարի քննությունից հետո Նորայր Փանոսյանի գործի քննությունը պետք է սկսվի նորից։

Արաքս Մամուլյան