Գազայում պատվաստումների ֆոնին Իսրայելն ավիահարվածներ է հասցրել փախստականների «Ջաբալիա» ճամբարին

Գազայի հյուսիսում փախստականների «Ջաբալիա» ճամբարին հասցված իսրայելական ավիահարվածի զոհ է դարձել առնվազն 8 մարդ։ Euronews-ի հաղորդմամբ՝ հարված է հասվել ՄԱԿ-ի՝ Մերձավոր Արևելքում Պաղեստինի փախստականների օգնության և աշխատանքների կազմակերպման գործակալության (UNRWA) հովանու ներքո գործող դպրոցից ոչ հեռու գտնվող հացի հերթին։

Միաժամանակ, իսրայելական զինված ուժերը հաղորդել են նույն տարածքում նոր թունելի ոչնչացման մասին, որն օգտագործվել է զենք տեղափոխելու համար, ներառյալ՝ հրթիռներ, որոնք կարող էին արձակվել Իսրայելի տարածքի վրա:

Այս ընթացքում Գազայի հատվածում մեծ թափով ընթանում է պոլիոմիելիտի դեմ երեխաների պատվաստումը։ Այն մեկնարակել է կիրակի։ Իսրայելական զորքերը համաձայնել էին ամեն օր որոշակի ժամերի դադարեցնել ակտիվ ռազմական գործողությունները։

«Պոլիոմիելիտի դեմ պայքարելու համար Առողջապահության համաշխարհային կազմակերպությունը և ՅՈՒՆԻՍԵՖ-ը Գազա են մատակարարել 2-րդ տիպի պատվաստանյութի 1,2 միլիոն չափաբաժին»,- ասել է UNRWA-ի առողջապահության հարցերով տնօրեն Ակիհիրո Սաիտան:

Գազայում վերջին քառորդ դարում պոլիոմելիտի հետ կապված կաթվածի առաջին դեպքը գրանցվել է օգոստոսի կեսերին: Դեռ հուլիսին Գազայի հատվածի կեղտաջրերում հայտնաբերվել էր պոլիովիրուս։

Միջազգային մարդասիրական կազմակերպությունները, որոնք տեղակայել են մի քանի հարյուր ստացիոնար և շարժական կայաններ, նախատեսում են պատվաստել 10 տարեկանից ցածր Գազայի ավելի քան 640 հազար բնակիչների։ Արշավի առաջին օրը՝ կիրակի, պատվաստվել է 87 հազար երեխա։