ԱՄՆ-ը ՀԱՄԱՍ-ի մի շարք առաջնորդների մեղադրանքներ է առաջադրել

ԱՄՆ Արդարադատության նախարարությունը պաղեստինյան արմատական ​​ՀԱՄԱՍ շարժման մի քանի առաջնորդների մեղադրանք է առաջադրել ահաբեկչության, սպանության դավադրության և պատժամիջոցներից խուսափելու մեջ: Այս մասին հայտնել է գերատեսչության մամուլի ծառայությունը, գրում է DW-ի ռուսական ծառայությունը։

Հետաքննության տվյալներով՝ մեղադրանքները կապված են ՀԱՄԱՍ-ի առաջնորդների կենտրոնական դերի հետ Իսրայելում 2023 թվականի հոկտեմբերի 7-ի «ահաբեկչական գործողությունների պլանավորման, աջակցության և իրականացման գործում»։

«Արդարադատության նախարարությունը Յահյա Սինվարին և ՀԱՄԱՍ-ի մյուս բարձրաստիճան ղեկավարներին մեղադրանք  է ներկայացրել ամերիկյան քաղաքացիների սպանության և տասնամյակներ ձգվող Միացյալ Նահանգների ազգային անվտանգությանը սպառնացող արշավը ֆինանսավորելու, ղեկավարելու և վերահսկելու մեջ»,- ասել է գլխավոր դատախազ Մերրիկ Գարլենդը:

Նա հիշեցրել է, որ հոկտեմբերի 7-ին կասկածյալները սպանել են շուրջ 1200 մարդու, այդ թվում՝ ԱՄՆ-ի ավելի քան 40 քաղաքացիների, առևանգել են հարյուրավոր խաղաղ բնակիչների։

Այս գործը, ըստ դիտորդների, հիմնականում խորհրդանշական է լինելու, քանի որ Սինվարը, ենթադրաբար, թաքնվում է ստորգետնյա թունելային համակարգում, իսկ մյուս երեք մեղադրյալները, հավանաբար, սպանված են:

Ավելի վաղ՝ օգոստոսի 30-ին, Գազայի հատվածի հարավում հայտնաբերվել էին 6 իսրայելցի պատանդների մարմինները՝ չորս տղամարդու և երկու կնոջ: Իսրայելի վրա ՀԱՄԱՍ-ի հարձակումից 11 ամիս անց, ըստ իսրայելական կողմի, 97 պատանդ մնում է ահաբեկիչների ձեռքում։