27.05.2026 | 17:40
Զելենսկին հրամայել է պատրաստվել ևս երկու-երեք տարվա պատերազմի․ The Economist
Կոնկրետ զարգացում չկա․ Էրդողանի կուսակցության խոսնակը՝ ԲՐԻԿՍ-ին Թուրքիայի անդամակցության մասին
Քաղաքականություն
04.09.2024 | 14:14
Թուրքիայի նախագահ Ռեջեփ Թայիփ Էրդողանի իշխող «Արդարություն և զարգացում» կուսակցության խոսնակ Օմեր Չելիքն Անկարայում մամուլի ասուլիսում անդադարձել է ԲՐԻԿՍ-ին երկրի անդամակցությանը, հաղորդում են տեղական լրատվամիջոցները։
«Մեր նախագահն արդեն մի քանի անգամ հայտարարել է, որ մենք ցանկանում ենք դառնալ ԲՐԻԿՍ-ի անդամ։ Այս հարցում մեր դիմումը պարզ է, գործընթացը շարունակվում է, բայց կոնկրետ զարգացում չկա։ Եթե որևէ կոնկրետ զարգացում լինի՝ որոշում կամ գնահատական ԲՐԻԿՍ-ի կողմից անդամակցության վերաբերյալ, մենք կկիսվենք ձեզ հետ»,- ասել է նա։
Պաշտոնյան նաև նշել է, որ «երկրի նախագահը հստակ հայտարարել է՝ Թուրքիան ցանկանում է մասնակից լինել բոլոր կարևոր հարթակներին, այդ թվում՝ ԲՐԻԿՍ-ին»։
Ավելի վաղ Bloomberg գործակալությունը, վկայակոչելով իր աղբյուրներին, հայտնել էր, որ Թուրքիան պաշտոնապես դիմել է՝ միանալու զարգացող տնտեսությունների ԲՐԻԿՍ-ի խմբին, քանի որ ձգտում է մեծացնել իր համաշխարհային ազդեցությունը և նոր կապեր հաստատել ավանդական արևմտյան դաշնակիցներից դուրս:
ԲՐԻԿՍ-ի հիմնադիր երկրներն են Բրազիլիան, Ռուսաստանը, Հնդկաստանը, Չինաստանն ու Հարավային Աֆրիկան։ Ներկայում կազմակերպությունը ներառում է 9 պետություն՝ Բրազիլիա, Ռուսաստան, Հնդկաստան, Չինաստան, Հարավային Աֆրիկա, Եգիպտոս, Իրան, Եթովպիա և Արաբական Միացյալ Էմիրություններ։
Նախօրեին էլ ՌԴ նախագահ Վլադիմիր Պուտինի օգնական Յուրի Ուշակովը հայտնել էր, որ Էրդողանն ընդունել է Կազանում կայանալիք ԲՐԻԿՍ-ի գագաթնաժողովին մասնակցելու հրավերը։
