09.09.2026 | 12:03
ՌԴ-ն հարվածել է Ուկրաինա-Մոլդովա սահմանի անցակետին․ երկու մարդ զոհվել է
Ռումինացի պատգամավորները հավանություն են տվել Patriot համակարգը Ուկրաինային փոխանցելուն
Քաղաքականություն
03.09.2024 | 22:57
Ռումինիայի խորհրդարանի ստորին պալատն օրենք է ընդունել, որը թույլ է տալիս Patriot զենիթահրթիռային համակարգի անվճար փոխանցումն Ուկրաինային, հայտնում է Reuters-ը։
«Հենց որ նախագահ Կլաուս Յոհանիսը ստորագրի օրենքը, կառավարությունը կարգադրություն կկատարի նվիրատվության մասին»,- ասվում է հայտարարության մեջ։
Հունիսին Բուխարեստը հայտարարեց, որ Ուկրաինային կտրամադրի իր երկու Patriot համակարգերից մեկը՝ պայմանով, որ դաշնակիցները հետագայում այն փոխարինեն հակաօդային պաշտպանության նմանատիպ համակարգով:
Ընդհանուր առմամբ, ռուսական ռազմական ագրեսիայից պաշտպանվող Ուկրաինային ՆԱՏՕ-ի անդամ երկրներից խոստացել են հինգ ռազմավարական հակաօդային պաշտպանության համակարգեր։ Այս մասին պայմանավորվածություն է ձեռք բերվել հուլիսին Վաշինգտոնում կայացած ՆԱՏՕ-ի գագաթնաժողովում։ Գերմանիան արդեն Ուկրաինային է փոխանցել Patriot հակաօդային պաշտպանության երեք համակարգ, խոստացված փոխանցումներից վերջինը տեղի է ունեցել հուլիսի 21-ին։
Հուլիսին Ուկրաինայի և Ռումինիայի նախագահներ Վլադիմիր Զելենսկին և Կլաուս Յոհանիսը համաձայնագիր են ստորագրել անվտանգության ոլորտում համագործակցության մասին, որը, մասնավորապես, նախատեսում է Ռումինիայի կողմից Patriot համակարգի փոխանցում Ուկրաինային։
