27.10.2026 | 00:08
Վարդան Մինասյանն աշխատանքի է անցել Լիբանանում
ՌԴ-ն հրթիռային հարված է հասցրել Պոլտավային. 41 մարդ է զոհվել, ավելի քան 180-ը՝ վիրավորվել
Քաղաքականություն
03.09.2024 | 16:08
Ռուսական զորքերը սեպտեմբերի 3-ին հրթիռային հարձակում են իրականացրել Պոլտավայի վրա, հայտարարել է Ուկրաինայի նախագահ Վլադիմիր Զելենսկին։ Նրա տեղեկացմամբ՝ զոհվել է 41, վիրավորվել՝ ավելի քան 180 մարդ, փոխանցում է Meduza-ն։
Զելենսկին հայտնել է, որ երկու բալիստիկ հրթիռները հարվածել են ուսումնական հաստատության և հիվանդանոցի տարածքին։ Մասամբ ավերվել է Կապի ինստիտուտի շենքերից մեկը։
«Ես կարգադրել եմ դեպքի բոլոր հանգամանքների լիարժեք և օպերատիվ հետաքննություն անցկացնել։ Փրկարարական աշխատանքներին ներգրավվել են բոլոր անհրաժեշտ ծառայությունները։ Ես երախտապարտ եմ բոլորին, ովքեր հարվածից հետո առաջին րոպեներից օգնում են մարդկանց, ովքեր կյանքեր են փրկում»,- ասել է Զելենսկին։
Պոլտավայի շրջանային ռազմական վարչակազմի ղեկավար Ֆիլիպ Պրոնինը հայտնել է, որ Պոլտավայի բնակիչներն արյուն են հանձնում՝ տուժածներին օգնելու նպատակով։
«Բոլոր համապատասխան ծառայություններն աշխատում են տեղում։ Փրկարարների և բժիշկների ամենահամակարգված գործողություններն այսօր մեկ կյանք չէ, որ փրկել են»,- ասել է Պրոնինը։
