Թայվանի վարչակազմի ղեկավարը Չինաստանի իշխանություններին առաջարկել է հողեր վերցնել ՌԴ-ից

Թայվանի վարչակազմի ղեկավար Լայ Ցինդեն հայտարարել է, որ եթե Թայվանի նկատմամբ Չինաստանի հավակնությունները վերաբերում են տարածքային ամբողջականությանը, ապա Չինաստանի իշխանությունները նաև պետք է վերադարձնեն 19-րդ դարում Ռուսաստանին տրված հողերը։ Լայը բարձրացրել է 1858 թվականի Այգունի պայմանագրի հարցը, որի շրջանակում Ամուր գետի երկայնքով հաստատվեց ռուս-չինական սահմանը, իսկ Պրիմորիեն մտավ Ռուսաստանի կազմի մեջ։

Ըստ Լայ Ցինդեի՝ «Թայվանը հարձակվելու և բռնակցելու» Չինաստանի ծրագրերը կապ չունեն այն ամենի հետ, ինչ ասում կամ անում է որևէ անհատ կամ քաղաքական կուսակցություն: Նա համոզված է, որ Չինաստանի իշխանությունները ցանկանում են բռնակցել Թայվանը՝ ոչ հանուն տարածքային ամբողջականության։

«Եթե դա տարածքային ամբողջականության համար է, ինչո՞ւ Պեկինը չի վերադարձնում Ռուսաստանի կողմից օկուպացված հողերը, որոնք փոխանցվել են Այգունի պայմանագրով։ Ռուսաստանը հիմա ամենաթույլ դիրքերում է, այնպես չէ՞։ Ռուսաստանին կարող եք խնդրել [հողերը զիջել], բայց չեք անում։ Ուստի ակնհայտ է, որ նրանք ցանկանում են ներխուժել Թայվան ո՛չ տարածքային պատճառներով»,- նրա խոքսերն է մեջբերում Reuters-ը։

Լայ Ցինդեն ասել է նաև, որ այն, ինչ Չինաստանն իսկապես ցանկանում է անել Թայվանի հետ կապված իր ծրագրով, կանոնների վրա հիմնված միջազգային կարգի փոփոխությունն է:

«Պեկինը ցանկանում է հեգեմոնիայի հասնել միջազգային ասպարեզում, Արևմտյան Խաղաղ օվկիանոսում, սա է նրա իրական նպատակը»,- վստահ է Թայվանի վարչակազմի ղեկավարը։