Հասարակություն
29.08.2024 | 11:47Սահմանադրական դատարանի դատավոր Հրայր Թովմասյանի գործով այսօրվա դատական նիստի ընթացում պաշտպան Արամ Օրբելյանը հիշեցրեց 2021 թվականին ԱԱԾ նախկին տնօրեն Արթուր Վանեցյանի հարցազրույցը Սաթիկ Սեյրանյանի Pressing հաղորդաշարին, որի ընթացքում Վանեցյանն, ըստ պաշտպանի, խոսել է Նիկոլ Փաշինյանի կողմից Վանեցյանին ուղղակիորեն տրված հրահանգին` Հրայր Թովմասյանի նկատմամբ քրեական հետապնդում հարուցելու վերաբերյալ:
Այս հաղորդման ընթացքում, պաշտպանի խոսքով, Վանեցյանը հայտարարել է Նիկոլ Փաշինյանի կողմից «կարմիր գծերն» անցնելու մասին:
«Ինձ ուղղակի հրահանգ է իջեցվել, որ պետք է գնալ, Սահմանադրական դատարանի դատավորներին վախեցնել, Հրայր Թովմասյանին վախեցնել, ընտանիքի վերաբերյալ ինչ-որ բաներ գտնել, երեխաների վերաբերյալ ինչ-որ վարկաբեկիչ քրեական գործեր հարուցել: Հիշո՞ւմ եք` մի օր Հրայր Թովմասյանն ասաց` հուսով եմ մի օր Արթուր Վանեցյանը կխոսի այդ մասին: Հիմա եմ խոսում: Այո՛, եղել են բազմաթիվ հրահանգներ` միջամտելու սահմանդրական դատարանի գործունեությանը»,- հայտարարել է Արթուր Վանեցյանը:
Օրբելյանի խոսքով` սա հանցագործության վերաբերյալ հաղորդում է, որին ոչ մի գործողություն չի հաջորդել:
Արաքս Մամուլյան
