06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
ՀՀ ԶՈՒ բարեփոխումներին, վերակառուցմանը և արդիականացմանն ուղղված ՀՀ Կառավարության գործողությունների գնահատման վերաբերյալ ՀՔԱՎ-ը տեղեկանք է հրապարակել
27.08.2024 | 21:59
ՀՔԱՎ-ը տեղեկանք է հրապարակել ՀՀ ԶՈՒ բարեփոխումներին, վերակառուցմանը և արդիականացմանն ուղղված ՀՀ Կառավարության գործողությունների գնահատման վերաբերյալ։
«Հելսինկյան քաղաքացիական ասամբլեայի Վանաձորի գրասենյակը արդեն չորրորդ տարին է՝ (2021, 2022, 2023, 2024) իր ուշադրության կենտրոնում է պահում ՀՀ Կառավարության 2021-2026 թթ. ծրագրով նախատեսված Զինված ուժերի բարեփոխումներին, վերակառուցմանն ու արդիականացմանն ուղղված աշխատանքները։
Արձանագրում ենք, որ Հայաստանի Հանրապետությունը վարում է ռազմական տեխնիկայի ձեռքբերման դիվերսիֆիակացման ռազմավարություն՝ էապես նվազեցնելով Ռուսաստանի Դաշնությունից ձեռք բերվող ռազմական տեխնիկայի քանակը և գործընկերներ ձեռք բերելով Արևմուտքում, Ասիայում, Հնդկաստանում։
Տեղեկանքում անդրադարձել ենք Հայաստան-ՌԴ/ՀԱՊԿ, Հայաստան-ԵՄ և Հայաստան-ՆԱՏՕ պաշտպանական և անվտանգային ոլորտներին վերաբերող 2021-2024 թթ. հանդիպումներին։ Դիտարկվել է, թե սպառազինության ձեռք բերման մասին տարածված տեղեկությունների հաճախականությունը ինչպես է փոփոխվել ՀՔԱՎ–ի հրապարակած տեղեկանքներն ընդգրկող ժամանակահատվածներում և Հայաստան-ՌԴ/ՀԱՊԿ, Հայաստան-ԵՄ/ՆԱՏՕ հանդիպումների ֆոնին։
Թե՛ նախորդ, թե՛ ներկայացվող տեղեկանքում Կազմակերպության կողմից ուսումնասիրություններն իրականացվել են ՀՀ զինված ուժերում բարեփոխումների վերաբերյալ պաշտոնական աղբյուրներով և զանգվածային լրատվամիջոցներով տարածված տեղեկությունների վերլուծությունների, ինչպես նաև ՀՀ պաշտպանության նախարարությանն ուղղված տեղեկատվության հարցումների հիման վրա։
ՀՀ կառավարության հնգամյա ծրագրով նախատեսված զինված ուժերի բարեփոխումների վերաբերյալ ենթակետի առաջնահերթությունները հետևյալն են՝
- Զինծառայության ժամկետների էական փոփոխություն՝ ի հաշիվ պայմանագրային ծառայության աճի, աստիճանաբար անցում պրոֆեսիոնալ բանակի:
- Զինված ուժերի կառավարման և ղեկավարման համակարգի արդյունավետության բարձրացում, պաշտպանության ոլորտի համապետական խնդիրների լուծմանն ուղղված անհրաժեշտ օրենսդրական փոփոխությունների իրականացում, ՀՀ ազգային անվտանգության ռազմավարության վերանայում, նոր ռազմական դոկտրինի մշակում, միասնական ավտոմատացված կառավարման համակարգի ներդրում:
- Արդյունավետության բարձրացում զինված ուժերի կազմակերպական և հաստիքային կառուցվածքի բարելավման միջոցով:
- Սպառազինության և ռազմական տեխնիկայի արդիականացում:
- Զորահավաքային նախապատրաստության և զորահավաքի մեխանիզմների կատարելագործում:
- Ռազմական կրթության և գիտության զարգացում:
- Տեղեկատվական անվտանգության և կիբերանվտանգության ոլորտի բարեփոխումներ:
- Զինված ուժերի բարոյահոգեբանական պատրաստության մակարդակի բարձրացմանն ուղղված ծրագրերի իրականացում:
- Զինծառայողների և նրանց ընտանիքների սոցիալական պաշտպանության բարձրացում, զինծառայության գրավչության բարձրացման և զինծառայողի հեղինակության մեխանիզմների կատարելագործում, զինծառայողների բնակարանային ապահովության ուղղությամբ ծրագրերի իրականացում, պատերազմի հետևանքներն իրենց վրա կրող զինծառայողների սոցիալական և առողջապահական նոր ծրագրեր:
- Զինված ուժերի նկատմամբ ժողովրդավարական և քաղաքացիական վերահսկողության, զինված ուժերի կարգապահության խթանման, զինված ուժերում մարդու իրավունքների պաշտպանության մեխանիզմների կատարելագործում:
- Ռազմավարական նշանակության օբյեկտների ու ենթակառուցվածքների անվտանգության մակարդակի բարձրացում»,- ասված է ՀՔԱՎ-ի տարածած հաղորդագրության մեջ:
