«Ռոստեխ»-ի ղեկավարը խոստովանել է՝ ՌԴ-ն խզում է օտարերկրյա պատվիրատուների հետ սպառազինության մատակարարման պայմանագրերը

Ռուսական ռազմական արդյունաբերության գործարանները խզում են օտարերկրյա պատվիրատուների հետ սպառազինության մատակարարման պայմանագրերը, խոստովանել է «Ռոստեխ»-ի ղեկավար Սերգեյ Չեմեզովը, փոխանցում է The Moscow Times-ը։

«Այժմ արտահանման մատակարարումները նվազել են հասկանալի պատճառներով․ ամեն ինչ ուղարկվում է ռազմաճակատ, ամեն ինչ՝ հանուն հաղթանակի»,- ասել է Չեմեզովը Reuters-ին տված հարցազրույցում՝ հավելելով, որ օտարերկրյա գործընկերների հետ կազմվում է «հետաձված պահանջարկի» համաձայնություն։

«Ռոստեխ»-ի ղեկավարի խոսքով՝ պետական պաշտպանության պատվերների կատարման անհրաժեշտության պատճառով ռուսական զենքի համար «սպասման ցուցակ» և «զգալի հերթ» է առաջացել։

Ըստ Չեմեզովի՝ վերջին մեկ տարվա ընթացքում խզված պայմանագրերի ծավալը կարող է հասնել 5-10 միլիարդ դոլարի։

Անցյալ տարվա մայիսին ռուսական զենքի մատակարարման պայմանագրերը խզելու մասին հայտարարեցին Հայաստանի իշխանությունները։ Փոխարտգործնախարար Մնացական Սաֆարյանը դժգոհեց, որ Երևանը չի ստացել, ի թիվս այլի, զենք, որի համար միջոցներն արդեն փոխանցված են։

2023 թվականի մարտին էլ հայտնի դարձավ, որ Ռուսաստանը խզում է Հնդկաստանի հետ С -400 Triumph զենիթահրթիռային համակարգերի մատակարարման մասին պայմանավորվածությունները։ «Ռոսօբորոնէքսպորտ»-ը 2018 թվականին 5,4 միլիարդ դոլար արժողությամբ պայմանագիր էր կնքել և պարտավորվել էր դրանք պատվիրատուին փոխանցել մինչև 2024 թվականի վերջ: Սակայն պատերազմն ու պատժամիջոցները խաթարեցին այս ծրագրերը:

Ռուսական կողմը «գրավոր ծանուցել է Նյու Դելիին հետաձգման մասինվ, գրում է Economic Times-ը՝ վկայակոչելով հնդկական ռազմաօդային ուժերի բարձրաստիճան պաշտոնյային:

Ստոկհոլմի Խաղաղության միջազգային հետազոտությունների ինստիտուտի (SPIRI) տվյալներով՝ 2019-2023 թվականներին ռուսական զենքի արտահանումը, նախորդ հինգ տարվա համեմատ, նվազել է 53%-ով։