Գերմանիայում ատոմակայանի վրայով ռուսական ԱԹՍ-ներ են թռել

Գերմանիայի Ֆլենսբուրգ քաղաքի դատախազությունը հետաքննություն է սկսել ատոմակայանի տարածքում ռուսական ԱԹՍ-ների թռիչքների կապակցությամբ, գրում է BILD-ի ռուսական ծառայությունը։

Միջադեպերը տեղի են ունեցել օգոստոսին Շլեզվիգ-Հոլշտեյնի արդյունաբերական տարածքում։ Անօդաչուները մեծ արագությամբ թռել են այն տարածքի վրայով, որտեղ, բացի անջատված ատոմակայանից, նաև հեղուկացված բնական գազի տերմինալ և քիմիական գործարաններ կան:

Պարբերականի լավատեղյակ աղբյուրի տվյալներով՝ տարածաշրջանի ոստիկանությունը բերվել է մարտական պատրաստության վիճակի։ Հաղորդվում է, որ ոչ թռիչքային գոտին խախտվել է մի քանի անգամ։ Ենթադրաբար, այն ռազմական ԱԹՍ է հատել։

«Ֆլենսբուրգի դատախազությունը հաստատում է վարույթի հարուցումը դիվերսիայի նպատակով գաղտնի գործողությունների կասկածանքով՝ կապված Շլեզվիգ-Հոլշտայնի կարևոր ենթակառուցվածքի վրայով անօդաչու թռչող սարքերի կրկնակի թռիչքների հետ»,- պարբերականին ասել է ավագ դատախազ Բերնդ Վինտերֆելդը:

BILD-ի տեղեկություններով՝ անօդաչու թռչող սարքերի թռիչքները գրանցվել են օգոստոսի 8-ից։ Ըստ նախնական տվյալների՝ անօդաչուները կարող էին արձակվել ռուսական կողմից Հյուսիսային ծովում գտնվող նավերից։ Գերմանիայի պետական անվտանգության ծառայության աշխատակիցները կարծում են, որ անհայտ ԱԹՍ-ները եղել են Orlan-10, որոնք ունեն 500-ից 600 կմ հեռահարություն և թռչում են 100 կմ/ժ-ից ավելի արագությամբ։ Ուժայինները կարծում են, որ դրանք կարող էին օգտագործվել դիվերսիոն նպատակներով։

Օգոստոսի 14-ին Գերմանիայում երկու ռազմակայան է փակվել օբյեկտներում հնարավոր դիվերսիաների պատճառով։ Der Spiegel-ի զրուցակիցները պատմել են, որ անհայտ անձինք մտել են Քյոլնի ավիաբազա, որտեղ կարող էին թունավորել ինքնավար ջրամատակարարման ցանցի ջուրը։ Այս բազայում, ի թիվս այլ բաների, գտնվում է Գերմանիայի կառավարության օդային նավատորմի շտաբը, որը մտնում է Գերմանիայի պաշտպանության նախարարության կազմի մեջ։