22.11.2024 | 19:18
Կարեն Սարուխանյանը հրապարակել է օրգանիզմում թմրանյութի առկայությունը ստուգող թեստի արդյունքները
Դեմոկրատների ազգային համագումարի վերջին օրը. Հարրիսը խոստանում է նախագահ լինել բոլոր ամերիկացիների համար
Քաղաքականություն
23.08.2024 | 11:46
Չիկագոյում ԱՄՆ Դեմոկրատական կուսակցության ազգային համագումարի վերջին օրը Քամալա Հարրիսը պաշտոնապես ընդունել է առաջադրումը որպես նախագահի թեկնածու և ելույթ ունեցել, որը, թերևս, նրա ամբողջ քաղաքական կարիերայի ամենագլխավոր ելույթն էր, գրում է BBC-ի ռուսական ծառայությունը։
Հարրիսը հորդորել է ամերիկացիներին օգտագործել գալիք ընտրությունները որպես «թանկարժեք հնարավորություն դեպի առաջ ուղի գծելու» համար՝ անկախ կուսակցական նախապատվությունից:
«Ես գիտեմ, որ այս գիշեր մեզ դիտում են տարբեր քաղաքական հայացքներ ունեցող մարդիկ: Եվ ես ուզում եմ, որ դուք իմանաք՝ ես խոստանում եմ լինել բոլոր ամերիկացիների նախագահը։ Ես կլինեմ այն նախագահը, որը կմիավորի մեզ մեր բարձրագույն ձգտումների շուրջ։ Նախագահ, որն առաջնորդում է և լսում»,- ասել է նա բուռն ծափահարությունների ներքո:
Հարրիսը նաև զգուշացրել է վտանգավոր հետևանքների մասին, եթե հանրապետական Դոնալդ Թրամփը վերադառնա Սպիտակ տուն։
«Մենք գիտենք, թե ինչպիսին կլինի Թրամփի երկրորդ ժամկետը։ Այս ամենն ամրագրված է «Նախագիծ 2025» փաստաթղթում։ Շատ առումներով Դոնալդ Թրամփը լուրջ մարդ չէ։ Սակայն նրա՝ Սպիտակ տուն վերադառնալու հետևանքները չափազանց լուրջ են»,- ասել է ԱՄՆ փոխնախագահը։
Նրա խոսքով՝ Թրամփը փորձում է հետ մղել երկիրը։
«Բայց մենք չենք վերադառնա անցյալ։ Ես ամբողջ սրտով սիրում եմ մեր երկիրը։ Ուր էլ գնամ և ում էլ հանդիպեմ, տեսնում եմ մի ազգ, որը պատրաստ է առաջ շարժվել, պատրաստ է հաջորդ քայլին և անհավանական ճանապարհորդության, որն Ամերիկան է»,- հայտարարել է նա։
Հարրիսի ելույթը քառօրյա համաժողովի գագաթնակետն էր։ Այս ընթացքում միջոցառմանը ելույթ են ունեցել ԱՄՆ գործող նախագահ Ջո Բայդենը, Բիլ և Հիլարի Քլինթոնները, Բարաք և Միշել Օբամաները, Ներկայացուցիչների պալատի նախկին խոսնակ Նենսի Փելոսին և Հարրիսի նախագահական մրցավազքի փոխնախագահի թեկնածու Թիմ Ուոլցը։
