11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
ՌԴ ԱԴԾ-ն գործ է հարուցել CNN-ի և ուկրաինական հեռուստաալիքների լրագրողների դեմ՝ Սուջայում նկարահանումների համար
Քաղաքականություն
22.08.2024 | 20:14
ՌԴ Անվտանգության դաշնային ծառայությունը (ԱԴԾ) քրեական գործեր է հարուցել ամերիկյան CNN հեռուստաալիքի թղթակից Նիք Փեյթոն Ուոլշի և ուկրաինական Mi Ukraine և Hromadske հեռուստաալիքների լրագրողներ Օլեսյա Բորովիկի և Դիանա Բուտսկոյի դեմ։ Գործեր են հարուցվել Կուրսկի մարզում ՌԴ պետական սահմանն ապօրինի հատելու դեպքի առթիվ։ Այս մասին հայտնել են գերատեսչության հասարակայնության հետ կապերի կենտրոնից, փոխանցում է DW-ի ռուսական ծառայությունը։
Նշվում է, որ օտարերկրյա լրագրողները Ռուսաստանի սահմանը հատելուց հետո տեսանյութեր են նկարահանել Կուրսկի մարզի Սուջա շրջանում։ Նրանք կհայտնվեն միջազգային հետախուզման մեջ, իսկ եթե մեղավոր ճանաչվեն ՌԴ ՔՕ 322-րդ հոդվածի 3-րդ մասով, նրանց սպառնում է մինչև 5 տարվա ազատազրկում։
Նիք Ուոլշը ռեպորտաժ է նկարահանել Սուջայի անցակետում, որտեղ նա հայտարարել է, որ «ռուսական սահմանը լիովին անպաշտպան է թվում»: Իր հերթին, ուկրաինացի թղթակիցներն այցելել են քաղաք։
Մի քանի օր առաջ ՌԴ ԱԴԾ-ն քրեական գործ էր հարուցել նաև իտալական պետական Rai հեռուստառադիոընկերության օպերատոր Սիմոնե Տրաինիի և թղթակից Ստեֆանիա Բատիստինիի դեմ՝ Սուջայում նկարահանումների համար։ Բատիստինին ուկրաինացի զինվորականների հետ Ուկրաինայի տարածքից մեքենայով հատել է ՌԴ սահմանը։ Այս կապակցությամբ ՌԴ ԱԳՆ-ն «խիստ բողոք» է հայտնել Ռուսաստանում Իտալիայի դեսպան Սեսիլիա Պիչոնիին։
