Բրյանսկի նահանգապետը հայտնել է Ուկրաինայի կողմից ճեղքման փորձի մասին
Քաղաքականություն
22.08.2024 | 14:08![](https://factor.am/wp-content/uploads/2024/08/455096594_848050597508020_839363398198158811_n1.jpg)
Ուկրաինացի զինվորականներն օգոստոսի 21-ի երեկոյան փորձել են մտնել Բրյանսկի շրջան, Տելեգրամում հայտնել է նահանգապետ Ալեքսանդր Բոգոմազը։ Նրա խոսքով՝ դիվերսիոն-հետախուզական խումբը ծրագրել էր ներթափանցումն իրականացնել Կլիմովսկի շրջանում։ Սկսվել է մարտ, որի արդյունքում, ըստ նահանգապետի, ռուս զինվորականներն ու ԱԴԾ սահմանապահները կանխել են ճեղքման փորձը։
«Իրավիճակը բախման վայրում կայունացել է և գտնվում է տարածաշրջանային օպերատիվ շտաբի հսկողության տակ»,- պնդում է Բոգոմազը։
«Два майора» Տելեգրամ-ալիքը հաստատել է մարտի փաստը՝ վկայակոչելով «մի քանի աղբյուրների», որոնք հայտարարել են, որ դա եղել է ուկրաինական հետախուզության «դիվերսանտների փոքր խումբ», «ոչ ոք նրանց հետևից դաշտային հրետանին առաջ չի քաշել»։ Մարտը սկսվել է Զաբրամա գյուղի մոտ։
Ալիքի հաղորդմամբ՝ ռուսական կողմից պաշտպանվել են 8 սահմանապահ ու չեչենական «Ախմատ» հատուկ ջոկատայինների 10 մարտիկ, իսկ ուկրաինական կողմից եղել է «առնվազն 20 զինվորական»։
Իր հերթին, լրագրող Յուրի Կոտենոկը գրել է, որ ոչ թե դիվերսիոն խումբ է փորձել ճեղքել սահմանը Բրյանսկի շրջանում, այլ առնվազն «ուժեղացված վաշտային տակտիկական խումբ»՝ մի քանի զրահամեքենաների աջակցությամբ։ Նրա կարծիքով՝ քաղաքացիական իշխանությունները «փորձում են հանգստացնել» բնակիչներին և «Կրեմլի իշխանություններին»՝ նվազեցնելով թշնամու ուժերի թիվը։
Mash ալիքն էլ պնդում է, որ ուկրաինացիները երկու անգամ մեկ ժամ տարբերությամբ փորձել են մտնել Բրյանսկի մարզի Զաբրամայի շրջան։ Ըստ այդ տվյալների՝ խումբը բաղկացած է եղել ավելի քան 200 հոգուց և հետևակի երեք մարտական մեքենաներից. առաջին մարտը սկսվել է ժամը 19:10-ին և տևել է 20 րոպե, իսկ մոտ 20:30-ին կազմակերպվել է երկրորդ հարձակումը «թիկունքից ուժեղացումով», որը նույնպես եղել է կարճ և հաջողություն չի գրանցել:
Բրյանսկի Կլիմովսկի շրջանը սահմանակից է Ուկրաինայի և Բելառուսի հետ, և մուտքն այնտեղ այժմ արգելափակված է։ Կիևը չի մեկնաբանել իրավիճակը։