09.09.2026 | 14:22
ԱԺ առողջապահության հարցերի մշտական հանձնաժողովի նիստը․ ՈՒՂԻՂ
«Հայֆիլմի» տարածքը, Երևանի 17-րդ թաղամասը և Սասունիկից որոշ տարածքներ կտրամադրվեն «Ակադեմիական քաղաքի» կառուցման համար
22.08.2024 | 12:29
Կառավարության որոշմամբ՝ Երևան քաղաքի և Արագածոտնի մարզի Աշտարակ համայնքի Սասունիկ բնակավայրի վարչական սահմաններում գտնվող որոշ տարածքներ գերակա շահ ճանաչվեցին։ Հարցն ընդգրկված է Կառավարության այսօրվա նիստի օրակարգում։
Գերակա շահ ճանաչված Սասունիկի որոշ հատվածներ նվիրաբերվելու են «Ակադեմիական քաղաք» հիմնադրամին։
Հիմնավորման համաձայն` տրվել է հանձնարարական՝ ներկայացնելու որոշման նախագիծ՝ Երևան քաղաքի 17-րդ թաղամասը և Համո Բեկնազարյանի անվան «Հայֆիլմ» կինոստուդիայի տարածքը «Ակադեմիական քաղաք» հիմնադրամին փոխանցելու նպատակով։ Սեփականության օտարման գործընթացը կկազմակերպեն Արագածոտնի մարզպետն ու Երևանի քաղաքապետը։
Ակադեմիական քաղաքի ստեղծման նպատակով որպես հիմնական տեղամաս ընտրվել է Երևան քաղաքի 17-րդ թաղամասի տարածքը (այսուհետ՝ Հիմնական տեղամաս), որի սահմաններում առկա են ինչպես պետության և համայնքի սեփականություն հանդիսացող հողամասեր, այնպես էլ ֆիզիկական և իրավաբանական անձանց պատկանող հողամասեր։
Նշենք, որ վարչապետ Նիկոլ Փաշինյանը վերջերս ֆեյսբուքյան իր էջում տեսանյութ էր հրապարակել՝ հայտնելով, որ պատրաստ է Ակադեմիական քաղաքի մաստեր պլանը, որը 450 էջանոց փաթեթ է և ուղարկվել է գերմանական ընկերության կողմից։
«Շատ ֆունդամենտալ գործ է արված, ընդհուպ վերլուծված են, թե քամիներն ինչ ուղղությամբ են փչում, որ հարթակից ինչ տեսարան պետք է բացվի և ինչպիսի բուսականություն պետք է լինի, որ շերտի բուսականությունն ինչպիսի գործառույթ պետք է իրականացնի։ Եվ սա ցույց եմ տալիս ոչ միայն այն պատճառով, որ Ակադեմիական քաղաքի նախագիծն առարկայանում է, այլև այն պատճառով, որ սա մի կուլտուրա է, որը մեր իրականության մեջ շատ հաճախ չեմ տեսնում, և ուրախ եմ, որ դա ևս մի կարևոր քայլ է հենց Ակադեմիական քաղաքի առիթով»,- ասել էր Փաշինյանը։
Մանյա Պողոսյան
