Սահմանադրական փոփոխությունների գործընթացը հանդիսանում է ՀՀ-ի ներքին գործը․ ԱԳՆ

Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովն «Ազատություն» ռադիոկայանին տված հարցազրույցում  կրկնել է իր ղեկավարի այն հայտարարությունը, որ եթե ՀՀ-ն չփոխի իր Սահմանադրությունը, խաղաղության պայմանագիրը չի կքնվի։

Նա նաև ասել է, որ  ՀՀ վարչապետ Նիկոլ Փաշինյանը Սահմանդրության փոփոխության հարցը քննարկել է Ադրբեջանի կառավարության ներկայացուցիչների հետ։ Ըստ նրա՝ Նիկոլ Փաշինյանը ժամանակ է խնդրել, որպեսզի կարողանա ընդունել նոր սահմանադրությունը:

Ալիևի ներկայացուցչի այս հայտարարության վերաբերյալ  Factor.am-ը գրավոր հարցում էր ուղարկել ՀՀ արտաքին գործերի նախարարություն։ Հարցմանն ի պատասխան արտգործնախարարությունից պատասխանել են, որ սահմանադրական փոփոխությունների  գործընթացը հանդիսանում է Հայաստանի Հանրապետության ներքին գործը։

Նշենք, որ Ադրբեջանը, մասնավորապես, խնդրահարույց է համարում Հայաստանի Սահմանադրության հղումը Անկախության հռչակագրին, որը հենվում է «Խորհրդային Հայաստանի ու Լեռնային Ղարաբաղի վերամիավորման մասին» դեռևս 1989-ին ընդունված որոշման վրա․ Բաքուն այստեղ տարածքային պահանջներ է տեսնում։

Հիշեցնենք, որ մայիսին վարչապետ Փաշինյանը հանձնարարել է նոր Սահմանադրության նախագիծ մշակել ու մինչև 2026 թվականի դեկտեմբերի 30-ը հաստատել:

Ավելի վաղ Factor.am-ը նոր Սահմանադրության նախագծի մշակման վերաբերյալ գրավոր հարցում էր ուղարկել Արդարադատության նախարարություն։ Ի պատասխան նախարարությունից տեղեկացրել էին, որ սահմանադրական բարեփոխումների խորհուրդը դեռևս սահմանադրական բարեփոխումների հայեցակարգի նախագծի մշակման փուլում է, և բուն նախագծի տեքստի մշակման շուրջ աշխատանքներ դեռ չեն տարվում:

Մանյա Պողոսյան