07.10.2026 | 11:20
Հայտնի է հունահռոմեական ոճի ըմբշամարտի Հայաստանի հավաքականի կազմն ԱԱ-ում
ԱՄՆ-ն ու եվրոպական մի շարք երկրներ Իրանին կոչ են արել զերծ մնալ էսկալացիայից․ Իրանն արձագանքել է
Քաղաքականություն
13.08.2024 | 16:08
ԱՄՆ-ը, Մեծ Բրիտանիան, Գերմանիան, Իտալիան և Ֆրանսիան Իրանի իշխանություններին կոչ են արել հրաժարվել Իսրայելի դեմ ռազմական հարձակման մշտական սպառնալիքներից։ Այս մասին ասվում է երկրների ղեկավարների բանակցությունների արդյունքներով Սպիտակ տան հրապարակած հայտարարության մեջ։
Նշվում է, որ կողմերը քննարկել են նաև տարածաշրջանային անվտանգությանն առնչվող հետևանքները, եթե այդպիսի հարձակում իրականացնի Իրանը։
Փաստաթղթում ասվում է, որ պետությունները նաև իրենց աջակցությունն են հայտնել տարածաշրջանում լարվածությունը թուլացնելու և պաղեստինյան ՀԱՄԱՍ շարժման կողմից պահվող իսրայելցի պատանդների ազատ արձակման շուրջ համաձայնության հասնելու ջանքերին: Բացի այդ, երկրներն աջակցություն են հայտնել Իրանի ագրեսիայից և Թեհրանի կողմից աջակցվող խմբավորումների հարձակումներից Իսրայելի պաշտպանվելուն:
«Մենք հավանություն տվեցինք նախագահ Ջո Բայդենի, Եգիպտոսի նախագահ Աբդել Ֆաթահ Խալիլ Էլ-Սիսիի և Կատարի Էմիր Թամիմի՝ բանակցություններն այս շաբաթվա վերջին վերսկսելու կոչին՝ հնարավորինս արագ համաձայնագիր կնքելու նպատակով, և ընդգծեցինք, որ այլևս չի կարելի ժամանակ կորցնել»,- ասվում է Սպիտակ տան կայքում հրապարակված հայտարարության մեջ։
Ըստ Reuters-ի՝ ի պատասխան՝ Իրանի ԱԳՆ-ն հայտարարել է, որ այդ երկրների զսպվածության կոչը «զուրկ է քաղաքական տրամաբանությունից» և հակասում է միջազգային իրավունքի սկզբունքներին։ Ըստ Իրանի ԱԳՆ խոսնակ Նասեր Քանանիի՝ պետություններն այդպիսով պահանջում են, որ Իրանը չարձագանքի իր ինքնիշխանության և տարածքային ամբողջականության խախտումներին։
