11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Զինված հարձակում Լոնդոնի կենտրոնում
Քաղաքականություն
12.08.2024 | 18:43
Մեծ Բրիտանիայի մայրաքաղաքի կենտրոնում՝ Լեսթեր հրապարակում տեղի ունեցած հարձակման ժամանակ 11-ամյա աղջիկ ու 34-ամյա կին են դանակահարվել։ Հարձակվողին ձերբակալել են դեպքի վայրում և բերման ենթարկել, ասվում է Լոնդոնի ոստիկանության X սոցիալական ցանցում տարածած հաղորդագրության մեջ, փոխանցում է BBC-ի ռուսական ծառայությունը։
Հարձակվողի ինքնության մասին տեղեկություններ դեռևս չկան։ Ոստիկանության տեղեկությունների համաձայն՝ միջադեպի հետ կապված այլ կասկածյալներ չկան։
Շտապօգնության աշխատակիցները հայտնել են, որ երկու տուժածները տեղափոխվել են խոշոր վնասվածքաբանական կենտրոն: Նրանց վիճակի մասին այս պահին տեղեկություններ չկան։ Անցորդներին ու մոտակա խանութների աշխատակիցներին հաջողվել է վնասազերծել հարձակվողին։
Լեսթեր հրապարակը գտնվում է Լոնդոնի աշխույժ Սոհո թաղամասի սրտում, որտեղ տեղակայված են մեծ թվով կինոթատրոններ, խանութներ, բարեր և ժամանցի այլ վայրեր ու գրավում են հսկայական թվով զբոսաշրջիկների:
Հարձակումը տեղի է ունեցել Մեծ Բրիտանիայում բողոքի ցույցերի ֆոնին, որոնց պատճառ է դարձել Սաութպորտի պարի ստուդիայի վրա տեղի ունեցած հարձակումը։ Դրա հետևանքով երեք երեխա է սպանվել:
