ՌԴ Պետդումայում զինվորականներին մեղադրել են Կուրսկի շրջանի պաշտպանությունը ձախողելու մեջ

Ռուս զինվորականները նախապես չեն պատրաստվել Ուկրաինայի Զինված ուժերի կողմից Կուրսկի շրջանի վրա հարձակմանը և պատշաճ կերպով չեն կառուցել պաշտպանությունը։ Նման հայտարարություն է արել ՌԴ Պետդումայի պատգամավոր, Ստորին պալատի պաշտպանության հանձնաժողովի անդամ, գեներալ-լեյտենանտ Անդրեյ Գուրուլևը, գրում է The Moscow Times-ը։

«Ո՞վ էր այն պլանավորել: Ո՞վ է մտածել այդ մասին: Սա լուրջ է։ Այսօր անհնար է նման լուրջ գործողություններ պլանավորել առանց մեր իմացության։ Չեմ հավատում, որ նրանք չգիտեին հակառակորդի զորքերի կենտրոնացման մասին [սահմանին]»,- գրել է Գուրուլևը Տելեգրամում։

Նա նաև քննադատել է Կուրսկի շրջանի պաշտպանական համակարգը։ Նրա խոսքով՝ ինքը տարածաշրջանում եղել է մինչ ուկրաինական ուժերի ներխուժումը և տեսել է, թե ինչպես են դաշտերն ականապատում։ Սակայն «առանց կրակային պաշտպանության» դրանք անօգուտ են, ընդգծել է Գուրուլևը։ Բացի այդ, ըստ պատգամավորի, պետական սահմանը պահող խումբը «սեփական հետախուզական միջոցներ չի ունեցել» և «վերջին պահին է ապահովվել անհրաժեշտ ամեն ինչով»։ Գուրուլևը կոչ է արել «մտածել, թե ինչ է կատարվում»։

«Մեզ մոտ զեկույցներում ոչ ոքի դուր չի գալիս ճշմարտությունը: Մեզ մոտ բոլորն ուզում են լսել, որ ամեն ինչ լավ է»,- եզրափակել է պատգամավորը։

Ավելի վաղ ՌԴ զինված ուժերի գլխավոր շտաբի պետ Վալերի Գերասիմովին «բռնել» էին նախագահ Վլադիմիր Պուտինին Կուրսկի շրջանում տիրող իրավիճակի մասին կեղծ տեղեկություններ հայտնելիս։ Ըստ «Նովայա գազետա»-ի լրագրող Վալերի Շիրյաևի՝ օգոստոսի 7-ին Անվտանգության խորհրդի նիստում Գերասիմովն ասել է, որ Ուկրաինայի զինված ուժերի մոտ 1000 զինվոր մտել է Ռուսաստանի տարածք, թեև արդեն այն ժամանակ բազմաթիվ ռազմական թղթակիցներ շատ ավելի մեծ թիվ էին նշել։