Կուրսկի շրջանում ռուսական բանակի ջախջախված շարասյան տեսանյութը հայտնվել է համացանցում

Օգոստոսի լույս 9-ի գիշերը տելեգրամ-ալիքներում սկսել են հայտնվել ռուսական ջախջախված ռազմական ավտոշարասյան տեսանյութերը, որին, իբր, հարվածել են Ուկրաինայի զինված ուժերը։ Անցնող մեքենաներից նկարահանված տեսանյութերից մեկում ճանապարհի երկու կողմերում կա 14 այրված բեռնատար և մեկ ՈՒԱԶ մակնիշի ավտոմեքենա։ Բեռնատարների հետնամասում տեսանելի են տասնյակ զինվորականների մարմիններ։ Տեսանյութից հնարավոր չէ գնահատել զոհերի թիվը, գրում է Meduza-ն։

Տեսանյութը նկարահանվել է Ռիլսկ քաղաքի ծայրամասում գտնվող Օկտյաբրսկոյե գյուղի E38 մայրուղու վրա։ Այն տեղից, որտեղ ոչնչացվել է ռուսական զինտեխնիկան մինչև Ուկրաինայի զինված ուժերի մոտակա հայտնի դիրքերը՝ Կորենևո շրջկենտրոնից դեպի արևելք, մոտ 30 կիլոմետր է, մինչև Ուկրաինայի հետ սահմանը՝ 35 կիլոմետր։

Հայտնի չէ, թե ռուսական բանակի ո՞ր ստորաբաժանմանն է պատկանել շարասյունը։ Ըստ որոշ տեղեկությունների՝ մեքենաները պատկանել են 44-րդ բանակային կորպուսին, որը Լենինգրադի ռազմական օկրուգի նոր ստորաբաժանում է, ստեղծվել է 2024 թվականին Լենինգրադի մարզի Լուգա քաղաքում։

«Ռազմական տեղեկատու» Telegram-ալիքը գրում է, որ օգոստոսի 9-ի գիշերը ավտոշարասյունը ենթարկվել է HIMARS MLRS հրթիռների հարձակման։ Ավելի ուշ այն հրապարակել է, իբր, Կուրսկի շրջանում հայտնաբերված HIMARS հրթիռների բեկորների լուսանկարը՝ նշելով, որ դրա հիման վրա կարելի է «վստահորեն փաստել», որ ավտոշարասյունը խոցվել է դրանց կողմից և «ոչ կամիկաձե անօդաչուներից»:

Mash տելեգրամ-ալիքի փոխանցմամբ՝ ավտոշարասյան վրա հարձակման հետևանքների վերաբերյալ տեսանյութերից մեկի հեղինակն արդեն ձերբակալվել է ԱԴԾ աշխատակիցների կողմից։ Նա Օկտյաբրսկոյե գյուղի 48-ամյա բնակիչ է, որը, իբր, կադրերը փոխանցել է ուկրաինական տելեգրամ-ալիքի ներկայացուցչին։ Հարցաքննության ժամանակ, ըստ աղբյուրի, կալանավորվածն ասել է, որ «նկարահանել և հանձնարարությամբ կադրեր է ուղարկել ուկրաինացիներին», փոխարենը նրան «խոստացել են գումար և ՆԱՏՕ-ի երկրներից մեկի քաղաքացիություն»։