Ուղղաթիռով չենք իջնելու աղբը տանենք․ բնակիչները չեն ուզում իրենց տան մոտ աղբաման դնենք․ Սաշա Կատվալյան․ ՏԵՍԱՆՅՈՒԹ

Քաղաքապետարանի «Երևանի աղբահանություն և սանիտարական մաքրում» հիմնարկի տնօրեն Սաշա Կատվալյանը Factor TV-ի հետ զրույցում ասում է, որ քաղաքում աղբահանության խնդիրը կարգավորվել է։

«Մի քանի պատճառներ կային. առաջինը՝ տեխնիկան, երկրորդը՝ Նուբարաշենի աղբավայրի ճանապարհի դժվարանցանելիությունը, երրորդը՝ եղանակը։ Ամռանը տեխնիկայի խափանումներն ավելի շատ են լինում»,- ասում է Կատվալյանն ու հավելում, որ տեխնիկայի խնդիրը համամետաբար լուծվել է՝ ձեռք են բերել ռուսական 8 «Կամազ» աղբատարներ։

Հիմնարկի տնօրենի խոսքով՝ այս պահին Երևանի աղբահանությունն իրականացվում է 57 մեքենայով, ևս 6 մեքենա ձեռք բերելու պայմանագիր կնքվել է, մինչև ամսվա վերջ Երևանում կլինեն, բայց, ըստ Կատվալյանի, դա էլ աղբահանության խնդիրն ամբողջությամբ չի լուծի։

«Մեր տեխնիկան նախատեսված է կենցաղային աղբ տանելու համար, բայց հաճախ բնակիչներն աղբամանների մեջ դնում են փայտեր, երկաթե պահեստամասեր, շինաղբ, և բեռնման ընթացքում տեխնիկան խափանվում է»,- մանրամասնում է Կատվալյանը։

Նրա խոսքով՝ Երևանի Կենտրոն և Արաբկիր վարչական շրջաններում աղբահանությունը ցերեկը երկու, հաճախ՝ երեք անգամ են իրականացնում, այլ վարչական շրջաններում՝ մեկ անգամ։

Կատվալյանն ասում է նաև, որ բնակիչները հաճախ՝ հիմնականում Սարի թաղում հրաժարվում են, որ խաչմերուկներում կամ իրենց տան մոտ աղբամաններ տեղադրվեն, բայց միևնույն ժամանակ դժգոհում են աղբահանությունից։ Հիմնարկի տնօրենը չի հերքում՝ Երևանը կեղտոտ է, պատճառաբանում է՝ տեխնիկական խնդրներ կան, այս պահին էլ ցախավելների գնման մրցույթն է կասեցվել, քանի որ մասնակիցներից մեկը բողոքարկել է արդյունքները։ Ասում է՝ եթե ցախավելներ չգնեն, քաղաքը սանիտարական ճգնաժամի առաջ կկանգնի։

Կատվալյանը խոսում է նաև պարգևավճարների, 60,000 ցախավելները համայնքին վերադարձնելու համար ներկայացված դատական հայցի, ԵԱՍՄ հիմնարկում 2022-2023 թվականներին իրականացված ստուգումների, սանմաքրման աշխատակիցների հագուստի գնման մրցույթ հայտարարելու և հիմնարկի տնօրենի պաշտոնում իր նշանակման մասին։

Հարցազրույցն ամբողջությամբ՝ տեսանյութում։

Արփի Հակոբյան