09.09.2026 | 16:49
Ադրբեջանի և Հայաստանի արտգործնախարարների առաջիկա հանդիպման շուրջ պայմանավորվածություն կա․ խոսնակ
Հինգշաբթի կամ ուրբաթ․ ԱՄՆ-ը՝ Իսրայելին Իրանի և «Հըզբոլլահ»-ի հարվածների հնարավոր ժամկետի մասին․ Al-Arabiya
Քաղաքականություն
07.08.2024 | 17:45
ԱՄՆ պաշտոնյաները կարծում են, որ Իրանը և «Հըզբոլլահ»-ը որոշել են հարվածել Իսրայելին ավելի ուշ, քան ենթադրվում էր, և կարող են հարձակումն իրականացնել հինգշաբթի կամ ուրբաթ, հաղորդում է Al-Arabiya հեռուստաալիքը՝ վկայակոչելով ամերիկյան հետախուզության տվյալներին ծանոթ աղբյուրների:
«Չնայած Իրանի և «Հըզբոլլահ»-ի պատասխանի բնույթը մնում է անհասկանալի՝ ԱՄՆ պաշտոնյաները վստահ են, որ հարձակումն անխուսափելի է: Նախնական գնահատականներն այն կանխատեսել էին շաբաթվա սկզբին, սակայն վերջին հետախուզական տվյալները ցույց տվեցին, որ պատասխանը հետաձգվել է մինչև հինգշաբթի կամ ուրբաթ երեկո»,- հայտնել է հեռուստաալիքը:
Հետախուզական տվյալները նաև ցույց են տալիս, որ Իրանը նախ կսպասի մինչև չորեքշաբթի Թեհրանի կողմից հրավիրված Իսլամական համագործակցության կազմակերպության արտակարգ նիստը՝ կապված ՀԱՄԱՍ-ի քաղբյուրոյի ղեկավար Իսմայիլ Հանիեի սպանության հետ:
Ավելի վաղ ԱՄՆ իշխանությունների անանուն ներկայացուցիչը հեռուստաալիքին ասել էր, որ Վաշինգտոնը կանխատեսում է հարձակումներ ԱՄՆ ուժերի վրա Սիրիայում և Իրաքում՝ որպես Իրանի և «Հըզբոլլահ»-ի պատասխան գործողությունների մաս։
Իրավիճակը Մերձավոր Արևելքում կտրուկ վատթարացել է անցյալ շաբաթ Թեհրանում Հանիեի և Բեյրութում «Հըզբոլլահ»-ի առաջնորդ Հասան Նասրալլայի ավագ խորհրդական Ֆուադ Շուքրի սպանությունից հետո: Իրանը և «Հըզբոլլահ»-ը խոստացել են վրեժ լուծել նրանց մահվան համար։
The New York Times-ը, հղում անելով իր աղբյուրներին, հայտնում է, որ Իրանի հոգևոր առաջնորդ այաթոլլա Ալի Խամենեին հրամայել է ուղիղ հարձակում իրականացնել Իսրայելի վրա՝ ի պատասխան Հանիեի սպանության։
