23.06.2026 | 09:53
ՀՀ տարածքում ավտոճանապարհներն անցանելի են
Կադաստրի թղթով հանցագործի հետ խաղաղության պայմանագի՞ր եք ուզում կնքել․ Բաքուն կաշառելով առաջ է գնում․ Անդրիաս Ղուկասյան․ ՏԵՍԱՆՅՈՒԹ
Քաղաքականություն
07.08.2024 | 19:00
Բաքվից հայտարարել են, որ խաղաղության պայմանագրի միակ ու հիմնական խոչընդոտն այս պահին Հայաստանի Սահմանադրությունն է։ Քաղաքագետ Անդրիաս Ղուկասյանը, մեկնաբանելով Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովի հայտարարությունները, Factor TV-ի հետ զրույցում ասում է, որ Ադրբեջանը չի ուզում խաղաղության պայմանագիր կնքել։
«Եթե նույնիսկ հիմա այդ պահանջը կատարված լիներ, խաղաղության պայմանագիր չէր կարող կնքվել։ Ադրբեջանի կողմից առաջ քաշվող հրապարակային հայտարարություններն ընդամենը քողարկում են այն, որ Իլհամ Ալիևի ռեժիմը մտադիր չէ խաղաղության պայմանագիր կնքել։ Նույնիսկ եթե Նիկոլ Փաշինյանն Ադրբեջանի ցանկությամբ փոխի ՀՀ Սահմանադրությունը, դիմում գրի ԵԱՀԿ Մինսկի խումբը լուծարելու համար, միջազգային դատարաններ ներկայացրած հայցերը հետ վերցնի, Արցախի խնդիրը կվերանա՞ և խաղաղության պայմանագիր կնքելու ճանապարհ կբացի՞։ Ո՛չ»,- ասում է քաղաքագետը։
Ադրբեջանցի պաշտոնյան նաև հայտարարել է, որ Փաշինյանը Հայաստանի Սահմանադրության հարցն իրենց հետ քննարկել է: Անդրիաս Ղուկասյանը չի բացառում, հիշեցնում է՝ Բաքվից հաճախ են նման հայտարարություններ հնչում։
«Իրենք անընդհատ մատնացույց են անում, որ Փաշինյանն իրենցից մեկն է»,- նշում է քաղաքագետը։
Ղուկասյանը խոսում է նաև սահմանազատման գործընթացի, հայ-թուրքական հարաբերությունների, Հարավային Կովկասում Եվրամիության հատուկ ներկայացուցիչ Տոյվո Կլաարի հայտարարությունների, Արցախի հարցով ՄԱԿ-ում փակ ձևաչափով քննարկումների և այլ հարցերի մասին։
Հարցազրույցն ամբողջությամբ՝ տեսանյութում։
Արփի Հակոբյան
