Արցախի հայաթափումն ական է․ Կլաարի առաջարկած տարբերակը կվնասազերծի այն, այլ ոչ թե կպայթեցնի․ Հայկ Խանումյան

Արցախի հայաթափումն ական է դրված ինտեգրացիոն ծրագրերի տակ, եթե չականազերծվի, շահագրգիռ կողմերը կարող են այն պայթեցնել, Factor TV-ի հետ զրույցում նման տեսակետ հայտնեց Արցախի «Ազգային վերածնունդ» կուսակցության ղեկավար Հայկ Խանումյանը։

Ըստ նրա՝  Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի առաջարկած տարբերակը կվնասազերծի այն, այլ ոչ թե կպայթեցնի։

«Այն, ինչ ասում է Տոյվո Կլաարն ամբողջովին բխում է արևմտյան Հարավային կովկասն ինտեգրացիոն ծրագրերում ներկայացնելու տրամաբանությունից։ Ինչն էլ, իր հերթին ենթադրում է, որ կոնֆլիկտ չպետք է լինի։ Այդ կոնֆլիկտի ամենամեղմ լուծումն է առաջարկել Կլաարը՝ արցախցիների կոլեկտիվ վերադարձ իրնց տներ»,- նշեց նա։

Հայկ Խանումյանի դիտարկմամբ՝ իրենք կարող են վերադառնալ միայն այն դեպքում, եթե ստեղծվի Արցախի ինքնավար հանրապետություն, լինեն երաշխավորված ինստիտուտներ, ինչպես նաև ազգային գվարդիա։

Հիշեցնենք, որ Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը, որն ավարտում է պաշտոնավարումը, ասել էր․ «ԵՄ-ն այս հարցում շատ հստակ է արտահայտվել։ Ես ակնկալում եմ, որ Ղարաբաղի հայերը կլինեն կարգավորման գործընթացի մաս, և Բաքվի ու նրանց միջև ուղիղ բանակցություններ կանցկացվեն իրենց հայրենի տարածաշրջան անվտանգ և արժանապատիվ վերադարձի շուրջ: Ադրբեջանն ունի պարտավորություն, որոնք, ինձ թվում է, նա չի հերքում»։

Մանրամասները՝ տեսանյութում։