15.07.2026 | 20:20
«Դրսից եկողների» դեմ փոփոխություն․ ՀՀ-ն խստացնում է ընտրական ցենզը, մինչ այլ երկրներ հրաժարվում են սահմանափակումներից
ԱՄՆ-ը Վրաստանին կոչ է անում անհապաղ ազատ արձակել Ադրբեջանի իշխանությունների կողմից հետապնդվող լրագրողին
Քաղաքականություն
07.08.2024 | 14:18
ԱՄՆ-ը Վրաստանի իշխանություններին կոչ է արել անհապաղ ազատ արձակել ադրբեջանցի լրագրող Աֆղան Սադիգովին, որն անցյալ շաբաթ կալանավորվել է Թբիլիսիում և տեղավորվել արտաքսվողների կենտրոնում։
«Մենք խորապես անհանգստացած ենք Թբիլիսիում Աֆղան Սադիգովի ձերբակալության մասին հաղորդումներով։ Կոչ ենք անում Վրաստանի իշխանություններին հարգել մարդու իրավունքներն ու հիմնարար ազատությունները և հնարավորինս շուտ ազատ արձակել նրան։ Նրա կալանավորումը տեղի է ունենում Ադրբեջանում քաղաքացիական հասարակության նկատմամբ շարունակվող ճնշումների ֆոնին, և մենք կրկին կոչ ենք անում Ադրբեջանի կառավարությանը՝ անհապաղ ազատ արձակել բոլոր անարդարացի ձերբակալվածներին, ձեռնպահ մնալ քաղաքացիական հասարակության թիրախավորումից, այդ թվում՝ արտերկրում, և դադարեցնել մամուլի ազատությունը խարխլելու փորձերը»,- ադրբեջանական Թուրան գործակալությանը հայտնել է ԱՄՆ Պետքարտուղարության ներկայացուցիչը։
Նշենք, որ Թբիլիսիի դատարանն օգոստոսի 4-ին որոշում է կայացրել Azel.TV կայքի ղեկավար Աֆղան Սադիգովին 2 ամսով կալանավորելու մասին։ Այս որոշման դեմ բողոք է ներկայացվել։ Ադրբեջանական լրատվամիջոցներին այս մասին հայտնել է նրա կինը՝ Սևինջ Սադիգովան։ Դեռևս օգոստոսի 3-ին կինը ֆեյսբուքյան ուղիղ եթերում հայտնել էր Սադիգովի ձերբակալության մասին։ Նա ասել է, որ դա տեղի է ունեցել իր և իր երեխաների աչքի առաջ, երբ միասին դուրս են եկել տնից։ Կինը կարծում է, որ իր ամուսնուն ձերբակալել է վրացական ոստիկանությունը՝ Ադրբեջանի իշխանությունների հրահանգով։ Սադիգովան վստահ է, որ ամուսնուն կալանավորել են Ադրբեջանի նախագահ Իլհամ Ալիևի հրահանգով։ «Վրաստանի իրավապահները հետևում են Ադրբեջանի բռնապետի հրահանգներին»,- ասել է նա։
Հուլիսի 18-ին էլ Սադիգովին Թբիլիսիի օդանավակայանում թույլ չէին տվել Անկարա թռչել։ Նրան ձերբակալել էին սահմանային և անձնագրային հսկողության կետում։ Սադիգովի խոսքով՝ իրեն ասել են, որ բացի Ադրբեջանից՝ այլ երկիր գնալ չի կարող գնալ։
Սադիգովը նախկին քաղբանտարկյալ է, որը 2016 թվականից ի վեր մի քանի անգամ կալանավորվել է Բաքվում։ Նա Վրաստանում է ապրում անցյալ տարվա դեկտեմբերի 24-ից։ Սադիգովը բուժման նպատակով գնացել է Վրաստան, սակայն սպառնալիքների պատճառով չի վերադարձել Ադրբեջան։ Նա նախկինում կալանավորվել է 2020 թվականի մայիսին՝ շորթման մեղադրանքով։ 2020-ի նոյեմբերի 3-ին դատարանը նրան դատապարտել է 7 տարվա ազատազրկման։ Վերաքննիչ դատարանը պատիժը կրճատել է մինչև 6 տարի, իսկ Գերագույն դատարանը՝ 4 տարի։ 2022 թվականի մայիսին նրան ներում է շնորհվել։
Էմմա Չոբանյան
