20.03.2026 | 23:39
Կիևը Մերձավոր Արևելք ռազմական խմբեր է ուղարկել՝ ԱԹՍ-ներ որսալու համար
Գլխավոր դատախազը շատ լավ հասկանում է՝ «Հաց բերողի» մահվան պատասխանատուն հենց ինքն է․ Արթուր Սաքունց
Քաղաքականություն
12.07.2017 | 12:30
ՀՀ գլխավոր դատախազ Արթուր Դավթյանը որևէ հիմնավորում չի կարող ներկայացնել իր արած հայտարարության վերաբերյալ։ Այս մասին Factor.am-ի հետ զրույցում հայտարարեց Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցն՝ անդրադառնալով երեկ խորհրդարանում գլխավոր դատախազի ուշագրավ հայտարարությանը, որ «Հաց բերող» անունը ստացած Արթուր Սարգսյանը կարող էր նոր հանցագործություն կատարել։
Հիշեցնենք՝ մոտ մեկ տարի առաջ ՊՊԾ գունդը գրավված «Սասնա ծռեր» խմբի անդամներին հաց հասցրած և նրանց աջակցելու մեջ մեղադրվող Արթուր Սարգսյանն անցած տարվա դեկտեմբերին ազատ արձակվեց, ապա մեկ ամիս անց նորից կալանավորվեց։ Պատգամավորների անձնական երաշխավորությամբ երկրորդ անգամ կալանքից ազատվելուց 10 օր անց, սակայն, «Հաց բերողը» մահացավ:
«Անձը, եթե պատրաստվում էր նոր հանցագործություն կատարել, ապա նրա նկատմամբ որպես խափանման միջոց ընտրված կալանքը չէին փոխի․ չէ՞ որ առաջին անգամ, երբ դեկտեմբեր ամսին փոխեցին հիմքում ընկած էր զուտ առողջական խնդիրները։ Այդ ժամանակահատվածում, երբ Արթուր Սարգսյանը գտնվում էր ազատության մեջ, որևէ հիմնավորում քննիչի կողմից դատարանին չներկայացվեց, որ Արթուր Սարգսյանը պատրաստվում է նոր հանցագործություն կատարել»,- ընդգծեց Արթուր Սաքունցը։
Իրավապաշտպանի համոզմամբ՝ գլխավոր դատախազը շատ լավ հասկանում է՝ Արթուր Սարգսյանի մահվան պատասխանատուն հենց ինքն է՝ որպես նախաքննության մարմնի նկատմամբ հսկողություն իրականացնող կառույց։
«Ուղիներ են փնտրում այդ պատասխանատվությունից խուսափելու համար։ Հանցագործության մեջ կասկածվող անձի վարքագիծ է, հանցագործություն կատարած անձինք, երբ փորձում են պատասխանատվությունից խուսափել, անհեթեթություններ են դուրս տալիս»,- հավելեց իրավապաշտպանը։
Մանրամասները՝ տեսանյութում։
Շողիկ Գալստյան
