23.06.2026 | 14:53
Բաքուն ԱՄՆ Կոնգրեսում Հայաստանի կողմից, իբր, «ադրբեջանցիների էթնիկ զտումների» մասին համաժողով է նախաձեռնել
Ուկրաինայի ԶՈՒ-ն Կուրսկի շրջանում երեք գյուղ է գրավել․ նահանգապետը բնակչությանն արյուն հանձնելու կոչ է արել
Քաղաքականություն
07.08.2024 | 11:14
Օգոստոսի 6-ին Կուրսկի շրջանի Սուդժանսկի շրջան ներխուժած ուկրաինական զորքերին հաջողվել է սահմանային գոտում ամրապնդել դիրքերը, հաղորդում է Ռուսաստանի պաշտպանության նախարարությանը մոտ կանգնած «Ռիբար» տելեգրամ-ալիքը, փոխանցում է Meduza-ն։
Տելեգրամ-ալիքի հեղինակ Միխայիլ Զվինչուկի տեղեկացմամբ՝ Ուկրաինայի զինված ուժերի ստորաբաժանումները գրավել են Նիկոլաևո-Դարինո, Դարինո և Սվերդլիկովո գյուղերը։ Բացի այդ, Գոնչարովկայում և Օլեշնիայում մարտեր են ընթանում ուկրաինական և ռուսական զորքերի միջև։
Ընդհանուր առմամբ, Ուկրաինայի զինված ուժերի մինչև 400 զինվորականներ ներխուժել են Կուրսկի շրջանի տարածք, մինչև երկու հազար զինվորականներ էլ կենտրոնացած են սահմանի երկայնքով, գրում է «Ռիբարը»։
Հաղորդվում է նաև, որ Ուկրաինայի զինված ուժերը շարունակում են առաջխաղացումը դեպի Սուջա, քաղաքի բնակչությունը փաստացի տարհանվել է։ Ռուսական պատերազմամետ էջերում խոսվում է այն մասին, որ ուկրաինական զորքերի նպատակներից մեկը կարող է լինել Սուջայի գազաչափման կայանի ոչնչացումը։
Կուրսկի նահանգապետի պաշտոնակատար Ալեքսեյ Սմիրնովը կոչ է արել բնակչությանն արյուն հանձնել՝ տարածաշրջանում մարտերի մասին տեղեկությունների ֆոնին։
«Կարող եք արյուն հանձնել Կուրսկի տարածաշրջանային արյան փոխներարկման կենտրոնում և շրջկենտրոնի Կարմիր հրապարակում գտնվող շարժական կայանում։ Կոչ եմ անում Կուրսկի բնակիչներին անտարբեր չմնալ»,- հավելել է նա։
Տեղական իշխանություններն ու ՌԴ պաշտպանության նախարարությունը մանրամասներ չեն հայտնում Կուրսկի շրջանում ընթացող մարտերի մասին։
