Սպանված Իսմայիլ Հանիեի փոխարեն ՀԱՄԱՍ-ը քաղբյուրոյի նոր ղեկավար ունի. Իսրայելի իշխանությունները կոչ են արել վերացնել նրան

ՀԱՄԱՍ-ի ղեկավարությունը որոշում է կայացրել կազմակերպության քաղաքական թևի նոր ղեկավարի հարցում։ Անցյալ շաբաթ Թեհրանում սպանված Իսմայիլ Հանիեի իրավահաջորդը կլինի Յահյա Սինվարը, որը նախկինում ղեկավարել է ՀԱՄԱՍ-ի քաղբյուրոն Գազայի հատվածում, գրում է BBC-ի ռուսական ծառայությունը։

«Իսլամական դիմադրության ՀԱՄԱՍ շարժումը հայտարարում է, որ Յահյա Սինվարն ընտրվել է շարժման քաղաքական թևի ղեկավար», – ասվում է խմբավորման հայտարարության մեջ:

Սինվարը Գազայի հատվածում խմբավորման ղեկավար է դարձել 2017 թվականին, մինչ այդ նա երեք անգամ հայտնվել է իսրայելական բանտում, որտեղ վերջին անգամ պետք է կրեր 4 ցմահ ազատազրկում։
Նրան հաջողվել է ազատության մեջ հայտնվել միայն այն պատճառով, որ նա մեկն էր այն շուրջ հազար գերիներից, որոնց Իսրայելն ազատ է արձակել իսրայելցի զինվոր Գիլադ Շալիթի դիմաց։

Բազմաթիվ վերլուծաբանների կարծիքով՝ հենց Սինվարն է անցյալ տարվա հոկտեմբերի 7-ին Իսրայելի վրա համակարգված հարձակումների շարքի գլխավոր կազմակերպիչն ու ռազմավարը, որոնց զոհ գնաց մոտ 1200 մարդ։

Սինվարի գտնվելու ճշգրիտ վայրը հայտնի չէ, բայց ընդհանուր առմամբ ընդունված է համարել, որ նա, ամենայն հավանականությամբ, դեռ թաքնվում է Գազայի հատվածում, որտեղ իսրայելական զորքերը կռվում են արդեն 11-րդ ամիսը:

Նոր ղեկավարի նշանակման մասին հայտարարությունը տեղի է ունենում Մերձավոր Արևելքում լարվածության հերթական սրման ժամանակաշրջանում: Հանիեի սպանության մեջ մեղադրելով Իսրայելի իշխանություններին՝ Թեհրանը և նրա դաշնակիցները խոստացել են «անխուսափելի հատուցում»:

Իսրայելի իշխանությունները դեռ ոչինչ չեն ասել Հանիեի սպանության մասին։ Միևնույն ժամանակ, Իսրայելի արտաքին գործերի նախարար Իսրայել Կացը երեքշաբթի երեկոյան կոչ է արել «արագ վերացնել» Սինվարին։

«Գլխավոր ահաբեկիչ Յահյա Սինվարի նշանակումը ՀԱՄԱՍ-ի նոր առաջնորդ՝ փոխարինելով Իսմայիլ Հանիեին, ևս մեկ համոզիչ պատճառ է նրան հնարավորինս արագ վերացնելու և այս ստոր կազմակերպությունը երկրի երեսից ջնջելու համար», – գրել է նա X սոցիալական ցանցում: