Որքան պարգևավճար կստանան Օլիմպիական խաղերում մեդալ նվաճող հայաստանցի մարզիկները

Փարիզում անցկացվող 33-րդ ամառային Օլիմպիական խաղերում ՕԽ ոսկե, արծաթե և բրոնզե մեդալակիր, աշխարհի քառակի և Եվրոպայի 7-ակի չեմպիոն Արթուր Ալեքսանյանն այսօր դուրս եկավ կիսաեզրափակիչ: Ըմբշամարտի աշխարհի չեմպիոն, Եվրոպայի եռակի չեմպիոն, 77 կգ քաշային հունահռոմեական ոճի ըմբիշ Մալխաս Ամոյանը ևս դուրս է եկել Փարիզում ընթացող Օլիմպիական խաղերի կիսաեզրափակիչ։ Երևանի ժամանակով 20։15-ին սպասվում են կիսաեզարափակիչ գոտեմարտերը։

Այս պահին Հայաստանն առայժմ միայն 1 արծաթե մեդալ ունի, որը նվաճել մարմնամարզիկ Արթուր Դավթյանը։

Այս ֆոնին Factor.am-ը ուսումնասիրել է, թե Օլիմպիական խաղերում մեղալակիրներին Հայաստանում ինչ պարգևատրումներ են սպասվում։

Դեռ 2022թ․ հունիսի 30-ի վարչապետ Նիկոլ Փաշինյանի որոշմամբ՝ մարզիկները «Փարիզ 2024» ծրագրով ստանում են նաև սպորտային նպաստ։ Այն տրվում է 2024 թ․ Փարիզի ՕԽ-ին նախապատրաստվելու և վարկանիշային մրցաշարերին մասնակցելու նպատակով։ Նպաստ ստանում են 2021 թ․ ՕԽ, 2021, 2022 կամ 2023 թթ․ աշխարհի և Եվրոպայի մեծահասակների առաջնությունների հաղթողները, մրցանակակիրները, Փարիզ 2024-ի մասնակցության վարկանիշ ձեռք բերած մարզիկները, ՕԽ-ում, ԱԱ-ներում 4-8-րդ տեղերը գրաված մարզիկները, ինչպես նաև երիտասարդների ԱԱ և Եվրոպայի 2021, 2022, 2023 թթ․ առաջնություններում մրցանակային տեղեր զբաղեցրածները։

2022 թվականի հունիսի 1-ից սպորտային նպաստ տրամադրվում է յուրաքանչյուր ամիս՝ հետևյալ չափով. օլիմպիական խաղերի ժամանակ մեծահասակների դեպքում 2-րդ տեղի համար սահմանվում է 500.000 դրամ։
Նույնքան գումար էլ տրամադրվում է աշխարհի մեծահասկաներ առաջնությունում հաղթողներին։

Ներկայացված թվերը չեն ներառում օրենսդրությամբ սահմանված հարկեր և պարտադիր այլ վճարներ:

Հավելենք նաև, որ մարզիկներին սպորտային ամսական նպաստ է տրամադրվում 2022 թ․ հունիսի 1-ից մինչև օլիմպիական խաղերի ավարտը իրենց 1 լավագույն արդյունքի համար:

Իսկ անվանական թոշակները 2020 թ․ հունվարից կրկնապատկվել են մինչև այդ սահմանված թոշակների համեմատ։ Այստեղ բացառություն է ՕԽ-ի վարկանիշի նվաճման դեպքը, որի համար մինչև 2020թ․ հունվարը սահմանված գումարը կազմել է 90 հազար, իսկ 2020-ի հունվարից՝ 300 հազար դրամ։

Հիշեցնենք, որ 2020 թվականին փետրվարի 20-ի կառավարության նիստում այդ ժամանակ Կրթության, գիտության, մշակույթի և սպորտի նախարարի պաշտոնը զբաղեցնոց Արայիկ Հարությունյանը հայտարարել էր, որ Օլիմպիական խաղերի արդյունքներով առաջին տեղ զբաղեցնող հայ մարզիկները կստանան 20-ական մլն դրամ, երկրորդ տեղ զբաղեցնողները՝ 15-ական մլն դրամ, իսկ երրորդ տեղը զբաղեցնողները՝ 10-ական մլն դրամ:

«Այս մարզիկներին մինչև կյանքի վերջ տրվող թոշակի չափը կավելանա: Մասնավորապես, աշխարհի չեմպիոնների համար այդ թիվը ներկայիս 55 հազար դրամի փոխարեն կդառնա 100 հազար դրամ: Օլիմպիական չեմպիոնների թոշակը ևս կկրկնապատկվի ու կդառնա 200 հազար դրամ»,- նշել էր նա։

Իր հերթին Նիկոլ Փաշինյանն ասել էր․ «Հայաստանի մինչև 2050 թվականի զարգացման ռազմավարության նախագծի մեջ ես առաջարկել եմ կետ ֆիքսենք, որ Հայաստանը մինչև 2050 թվականը պետք է ունենա առնվազն 25 օլիմպիական մեդալ, նվաճի շախմատի աշխարհի անհատական չեմպիոնի կոչումը, և ֆուտբոլի ազգային հավաքականը մինչև 2050 թվականը պետք է դառնա աշխարհի կամ Եվրոպայի առաջնության մրցանակակիր: Սա ոչ միայն քաղաքական, սոցիալ-հոգեբանական, այլև տնտեսական հարց է»։

Մանյա Պողոսյան