09.09.2026 | 20:19
«Առգրավումներն իրականացվել են կամայականորեն՝ շոուի նպատակով». Գագիկ Խաչատրյանի պաշտպանական կողմը՝ ՔԿ-ի գործողությունների մասին
ԵՄ-ն Իսրայելին կոչ է անում դադարեցնել կրակը Գազայում
Քաղաքականություն
06.08.2024 | 18:48
Եվրամիությունն Իսրայելին կոչ է անում դադարեցնել կրակը Գազայի հատվածում և կատարել միջազգային իրավունքով ստանձնած պարտավորությունները։ Այս մասին հայտարարել է ԵՄ դիվանագիտության ղեկավար Ժոզեպ Բորելը, տեղեկանում ենք ԵՄ կայքում արված հրապարակումից։
«Մենք կոչ ենք անում Իսրայելի կառավարությանը զերծ մնալ գործողություններից, որոնք վատթարացնում են Գազայում խաղաղ բնակիչների կենսապայմանները և հետևել միջազգային իրավունքով ստանձնած պարտավորություններին: Անհապաղ հրադադար է անհրաժեշտ՝ Գազայում խաղաղ բնակիչների, ինչպես նաև իսրայելցիների ծանր վիճակին վերջ տալու համար»,- ասել է եվրոպացի դիվանագետը։
Բորելը նշել է, որ Գազայում հումանիտար աղետը կյանքին սպառնացող պայմաններ է ստեղծում խաղաղ բնակչության համար, որը տասներորդ ամիսն անընդմեջ շարունակում է տառապել սովից և բազմիցս տեղահանվում է գերբնակեցված վրանային ճամբարներ։
ԵՄ արտաքին գործերի գերագույն հանձնակատարը նաև հիշեցրել է, որ կարևոր ենթակառուցվածքների թիրախավորումը ռազմական հանցագործություն է։
«Միջազգային մարդասիրական իրավունքի խախտումները պետք է մանրակրկիտ և անկախ հետաքննվեն ու պատասխանատվություն ապահովվի»,- ընդգծել է Բորելը:
Մինչ այս, Կանադան, Ավստրալիան և Նոր Զելանդիան Իսրայելին և ՀԱՄԱՍ-ին կոչ էին արել անհապաղ զինադադար հաստատել Գազայում։
