«Ռուս-ադրբեջանական հարաբերություններն անվտանգության կարևոր գործոն են Հարավային Կովկասում»․ ինչ են քննարկել Ալիևն ու Շոյգուն

Ադրբեջանի նախագահ Իլհամ Ալիևը Բաքվում ՌԴ Անվտանգության խորհրդի քարտուղար Սերգեյ Շոյգուի հետ հանդիպմանն ասել է, որ այցը լավ հնարավորություն է ստեղծում երկկողմ հարաբերությունների օրակարգը և փոխադարձ հետաքրքրություն ներկայացնող հարցերը քննարկելու համար, գրում են ադրբեջանական լրատվամիջոցները։

Նա նշել է տարածաշրջանում ընթացող գործընթացների առնչությամբ Ադրբեջանի և Ռուսաստանի միջև կանոնավոր շփումների կարևորությունը։

«Ասելով, որ մեր երկկողմ հարաբերությունները հաջողությամբ զարգանում են, Ադրբեջանի նախագահն ընդգծել է, որ դա դրսևորվում է բարձրագույն և այլ մակարդակներում շփումներով, ինչպես նաև մեր երկրների միջև ստորագրված փաստաթղթերի և ճանապարհային քարտեզների իրագործմամբ, անվտանգության, տրանսպորտի, էներգետիկայի , ռազմատեխնիկական և հումանիտար ոլորտներում համագործակցությամբ։ Նախագահ Իլհամ Ալիևը հայտարարել է, որ այդ հարցերի շուրջ պարբերաբար քննարկումներ են անցկացվում նախագահ Վլադիմիր Պուտինի հետ»,- ասվում է հաղորդագրության մեջ։

Նշելով, որ միջկառավարական հանձնաժողովն ակտիվորեն աշխատում է, Ալիևը հայտնել է, առաջիկա օրերին Բաքվում կկայանա այդ հանձնաժողովի նիստը։ Նա գոհունակությամբ նշել է երկու երկրների քաղաքական ղեկավարության միջև ընդունված որոշումների հաջող իրականացումը, մասնավորապես, «Ադրբեջանի Հանրապետության և Ռուսաստանի Դաշնության միջև փոխադարձ համագործակցության մասին» հռչակագրի դրույթները։ Նշելով, թե ադրբեջանա-ռուսական հարաբերություններն օրինակ են որոշ հարևան պետությունների համար, Ալիևը դա գնահատել է «որպես անվտանգության կարևոր գործոն Հարավային Կովկասում և ավելի լայն տարածքում»։

«Սերգեյ Շոյգուն իր հերթին ընդգծել է մեր երկրների միջև հարաբերությունների հաջող զարգացումը տարածաշրջանային անվտանգության, ռազմատեխնիկական, տրանսպորտային և տնտեսական ոլորտներում։ Նա նշել է, որ երկկողմ համագործակցության օրակարգում շատ կարևոր հարցեր կան, և դրանք հաջողությամբ լուծվել են։ Այս առումով նա, որպես դրա օրինակ, արժևորել է «Հյուսիս-Հարավ» միջանցքի իրականացումը և նշել, որ այս առումով եռակողմ սկզբունքով մեծ աշխատանք է կատարվել»,- ասվում է ադրբեջանական կողմի հաղորդագրության մեջ։

Շոյգուն հայտարարել է, որ Ռուսաստանն աջակցում է Ադրբեջանի և Հայաստանի միջև հարաբերությունների կարգավորման գործընթացին։

Հանդիպմանը քննարկվել են «3+3» ձևաչափով համագործակցության հեռանկարները։