09.09.2026 | 14:22
ԱԺ առողջապահության հարցերի մշտական հանձնաժողովի նիստը․ ՈՒՂԻՂ
Վերին Լարսի անցակետն այս գիշեր չի գործի, 800 հայկական բեռնատար կա կուտակված․ Վահան Հակոբյան
Քաղաքականություն
05.08.2024 | 18:49
Վերին Լարսի անցակետն այս գիշեր 01:00-ից մինչ առավոտյան 10:00 չի գործի և փակ կլինի բոլոր տեսակի ավտոմեքենաների համար, այս մասին Factor.am-ին տեղեկացրեց ՌԴ-ում ՀՀ դեսպանատան մաքսային կցորդ Վահան Հակոբյանը՝ նշելով, որ պատճառն անցակետի վերազինման աշխատանքներն են։
«Վերին Լարսի վրացական կողմում այս գիշեր նախատեսվում է իրականացնել տեխնիկական վերազինման աշխատանքներ, ինչի հետևանքով անցակետը երկու ուղղությամբ էլ չի սպասարկելու։ Վերազինման աշխատանքներն ավարտվելուն պես նախատեսվում է, որ անցակետի աշխատանքն առավոտյան կվերականգնվի»,- մանրամասնեց մաքսային կցորդը։
Վահան Հակոբյանը հայտնեց, որ այս պահին Վերին Լարսում կուտակումներ կան՝ թե՛ մարդատար ավտոմեքենաների, թե՛ բեռնատարների։ ՌԴ-ում ՀՀ դեսպանատան մաքսային կցորդի փոխանցմամբ՝ ռուսական կողմում ընդհանուր 3000 բեռնատար սպասում է, որ դուրս գա դեպի Վրաստան, որոնցից մոտ 800 հայկական է։
«Մեքենաների կուտակումների պատճառը տուրիստական սեզոնն է․ խնդիրը նրանում է, որ այս սեզոնին մարդատար մեքենաները շատ են, իսկ վրացական կողմը չի կարողանում ամբողջ հոսքը սպասարկել, որպեսզի կուտակումներ չառաջանան։ Հոսքն ավելի մեծ է, քան երբևէ եղել է»,- եզրափակեց նա։
