Բանգլադեշի վարչապետը հրաժարական է տվել և լքել երկիրը՝ զանգվածային բողոքի ցույցերի ու հարյուրավոր զոհերի ֆոնին

Բանգլադեշի վարչապետ Շեյխ Հասինան հրաժարական է տվել և լքել երկիրը զանգվածային բողոքի ցույցերի ֆոնին, որոնք հանգեցրել են հարյուրավոր զոհերի, գրում է BBC-ի ռուսական ծառայությունը։

Նշվում է, որ Շեյխ Հասինան երկուշաբթի  մեկնել է Հնդկաստանի Ագարթալա քաղաք՝ Դաքքայից փախուստից հետո։ Հնդկաստանը մտադիր է նրան անվտանգ անցում առաջարկել, նշում են հետախուզական աղբյուրները։

Երկրի բանակի շտաբի պետ, գեներալ Վաքեր-Ուզ-Զամանը ժողովրդին ուղղված ուղերձում հաստատել է, որ վարչապետը հրաժարական է տվել։ Նա հայտարարել է, որ ձևավորվելու է ժամանակավոր կառավարություն՝ հավելելով, որ մտադիր է հանդիպել նախագահ Մուհամեդ Շահաբուդդինի հետ ու հույս հայտնել, որ լուծումը մինչև օրվա վերջ կգտնվի։

Զամանն ասել է, որ արդեն խոսել է երկրի ընդդիմադիր քաղաքական կուսակցությունների հետ: Դեռևս պարզ չէ, թե ով է գլխավորելու կառավարությունը։ Նա  «արդարություն» է խոստացել Բանգլադեշի բոլոր մարդկանց համար, մի բան, որը պահանջում են ցուցարարները վերջին մի քանի շաբաթվա ընթացքում հարյուրավոր մարդկանց մահից հետո:

Երկուշաբթի հազարավոր մարդիկ ներխուժել են Գանոբհաբան՝ վարչապետի նստավայր: Կադրեր են հայտնվել, որտեղ երևում է, թե ինչպես են ցուցարարները թալանում վարչապետի նստավայրը։

Կիրակի օրը առնվազն 90 մարդ է զոհվել ոստիկանության և վարչապետի հրաժարականը պահանջող ցուցարարների միջև բախումների հետևանքով։ Զոհվածների թվում են 13 ոստիկաններ։ Նրանք սպանվել են մայրաքաղաք Դաքայից 100 կմ հյուսիս գտնվող Սիրաջգանջ քաղաքում ոստիկանական բաժանմունքի վրա հարձակման հետևանքով։

Ուսանողների բողոքի ակցիաները պետական ծառայության աշխատատեղերի քվոտային համակարգի վերացման պահանջով սկսվել էին հուլիսին։ Բողոքի ցույցերը վերաճել են վարչապետի իշխանությունից հեռացնելու արշավի, որը 15 տարի իշխանության ղեկին է և վերջին անգամ հունվարին վերընտրվել է չորրորդ ժամկետով:

Այս ընթացքում ավելի քան 280 մարդ է մահացել։ Ոստիկանությունը արցունքաբեր գազ և ռետինե փամփուշտներ է կիրառել ցուցարարներին ցրելու համար, իսկ վարչապետը հրամայել է երկրում անջատել բջջային ինտերնետը։

ՄԱԿ-ի մարդու իրավունքների գերագույն հանձնակատար Վոլքեր Թյուրքը կոչ է արել Բանգլադեշի իշխանություններին դադարեցնել բռնությունները։ Նա նաև մտահոգություն է հայտնել երկուշաբթի Դաքայում ծրագրված զանգվածային երթի կապակցությամբ և նախազգուշացրել հետագա էսկալացիայի ռիսկի մասին։