Իսրայելը դիտարկում է Իրանին կանխարգելիչ հարված հասցնելու հնարավորությունը

Իսրայելի իշխանությունները դիտարկում են Իրանի սպասվող հարձակմանն արձագանքելու տարբերակներ, այդ թվում՝ կանխարգելիչ հարված հասցնելու հնարավորությունը, գրում է Ynet պորտալը՝ վկայակոչելով անանուն պաշտոնյաների։

«Առաջին անգամ վարչապետը և նրա անվտանգության աշխատակիցները քննարկել են հնարավոր կանխարգելիչ հարվածը»,- ասվում է հրապարակման մեջ։

Սակայն, ըստ լրատվականի, դրա համար անհրաժեշտ է, որպեսզի ԱՄՆ-ն ու Իսրայելն ունենան անհրաժեշտ հետախուզական տվյալներ, այդ թվում՝ Իրանի գրոհի ծրագրի մասին։ Ընդ որում, ըստ իսրայեցի պաշտոնյայի, հրեական պետության ռազմական ներուժն ու ամերիկյան ռազմական մասնակցության մակարդակը «հասել են գագաթնակետին»։

Հուլիսի 31-ին պաղեստինյան ՀԱՄԱՍ շարժումը հայտնել էր Թեհրանում գտնվող նստավայրի վրա հարձակման հետևանքով քաղբյուրոյի ղեկավար Իսմայիլ Հանիեի մահվան մասին, ուր նա ժամանել էր Իրանի նորընտիր նախագահի երդմնակալությանը մասնակցելու։ Շարժումը սպանության համար պատասխանատու է համարում Իսրայելին և Միացյալ Նահանգներին՝ խոստանալով, որ այս հարձակումն անպատասխան չի մնա։

Միաժամանակ, մեկ օր անց Լիբանանում սպանվել է «Հըզբոլլահ» շարժման բարձրաստիճան հրամանատար Ֆուադ Շուքրը Բեյրութի հարավային արվարձաններին իսրայելական ավիահարվածի հետևանքով։ «Հըզբոլլահ»-ի առաջնորդ Հասան Նասրալլան հայտարարել է, որ շարժումն անցնում է Իսրայելի հետ պայքարի նոր մակարդակի։

Իսրայելը չի մեկնաբանել Հանիեի մահվան հետ կապված մեղադրանքները, սակայն ընդունել է Շուքրի դեմ մահափորձի պատասխանատվությունը, որին Իսրայելի պաշտպանության բանակը պատասխանատու է համարում Գոլանի բարձունքների հրետակոծության համար, որի հետևանքով 12 մարդ է զոհվել:

Ըստ The New York Times-ի՝ Հանիեի սպանությունից հետո Իրանի գերագույն առաջնորդ Ալի Խամենեին հրամայել է ուղիղ հարված հասցնել Իսրայելին։ Իսլամական հեղափոխության պահապանների կորպուսը հայտարարել է, որ Հանիեի արյանը կպատասխանի «խիստ պատիժով», որը պետք է իրականացվի համապատասխան ձևով, համապատասխան ժամանակ և վայրում: