09.09.2026 | 16:49
Ադրբեջանի և Հայաստանի արտգործնախարարների առաջիկա հանդիպման շուրջ պայմանավորվածություն կա․ խոսնակ
Իրանն ու «Հըզբոլլահ»-ը կարող են հարձակվել Իսրայելի վրա առաջիկա 1-2 օրվա ընթացքում․ Բլինքեն
Քաղաքականություն
05.08.2024 | 11:30
ԱՄՆ պետքարտուղար Էնթոնի Բլինքենը կիրակի G7-ի երկրների իր գործընկերներին ասել է, որ Իրանի և «Հըզբոլլահ»-ի հարձակումն Իսրայելի վրա կարող է սկսվել արդեն երկուշաբթի։ Այս մասին Axios-ին հայտնել է երեք աղբյուր:
Բլինքենը տեսակոնֆերանս է հրավիրել, որպեսզի ԱՄՆ-ի մերձավոր դաշնակիցների հետ համակարգի Իրանի և «Հըզբոլլահ»-ի վրա դիվանագիտական ճնշում գործադրելու ջանքերը՝ հնարավորինս նվազագույնի հասցնելու նրանց պատասխան գործողությունների հնարավորությունը:
Իրանը և նրա լիբանանյան դաշնակից «Հըզբոլլահ»-ը խոստացել են պատասխանել Իսրայելի կողմից Թեհրանում ՀԱՄԱՍ-ի քաղաքական առաջնորդ Իսմայիլ Հանիեի և Բեյրութում «Հըզբոլլահ»-ի ռազմական հրամանատար Ֆուադ Շուքրի սպանություններին:
Աղբյուրներն ասել են, որ Բլինքենն ընդգծել է՝ ԱՄՆ-ը հավատում է, որ Իրանը և «Հըզբոլլահ»-ը կպատասխանեն: Նա նաև ասել է, որ պարզ չէ, թե պատասխանն ինչ ձևով է լինելու։ Բլինքենն ասել է, որ ԱՄՆ-ը չգիտի հարձակումների ճշգրիտ ժամանակը, սակայն ընդգծել է՝ այն կարող է սկսվել առաջիկա 24-48 ժամվա ընթացքում, այսինքն՝ երկուշաբթի օրը։
Պետքարտուղարն իր գործընկերներին ասել է, որ Միացյալ Նահանգներն աշխատում է էսկալացիայի ցիկլը կոտրելու ուղղությամբ՝ փորձելով հնարավորինս սահմանափակել Իրանի և «Հըզբոլլահ»-ի հարձակումները, իսկ հետո զսպել Իսրայելի պատասխանը: Բլինքենը խնդրել է մյուս արտգործնախարարներին դիվանագիտական ճնշում գործադրել Իրանի, «Հըզբոլլահ»-ի և Իսրայելի վրա՝ առավելագույն զսպվածություն պահպանելու համար: Բլինքենը G7-ի արտգործնախարարներին ասել է, որ տարածաշրջանում ԱՄՆ-ի ուժերի ավելացումը զուտ պաշտպանական նպատակներով է։
Տեսազանգին ներկա աղբյուրներից մեկն ասել է, որ Բլինքենը վրդովված է եղել, երբ նախարարներին տեղեկացրել է Իսրայելի հետ Գազայի պատանդների և հրադադարի համաձայնագրի շուրջ վերջին բանակցությունների մասին: Նա ասել է, որ վարչակազմը զգում էր, որ «մոտ է բեկմանը»՝ մինչև Թեհրանում սպանությունը:
«Մենք մեր խորը մտահոգությունն ենք հայտնում Մերձավոր Արևելքում լարվածության բարձր մակարդակի կապակցությամբ, որը սպառնում է ավելի լայն հակամարտություն հրահրել տարածաշրջանում։ Կոչ ենք անում բոլոր ներգրավված կողմերին ձեռնպահ մնալ պատասխան բռնության ներկայիս կործանարար ցիկլը շարունակելուց, նվազեցնել լարվածությունը և կառուցողականորեն ներգրավվել լարվածության թուլացման գործում: Ոչ մի երկիր կամ ազգ չի շահի Մերձավոր Արևելքում հետագա էսկալացիայից»,- ասվում է G7-ի նախարարների հայտարարության մեջ։
Պետքարտուղարության խոսնակ Մեթյու Միլլերը լրատվամիջոցին հրաժարվել է մեկնաբանություն տալ։
