ԱՄՆ-ը Մադուրոյին չի ճանաչում որպես Վենեսուելայի նախագահ. նրա ընդդիմախոսները բողոքում են, հարևան երկրները՝ բացատրություն ակնկալում

ԱՄՆ պետքարտուղար Էնթոնի Բլինքենը հայտարարել է, որ Վաշինգտոնը Վենեսուելայի նախագահական ընտրությունների օրինական հաղթող է համարում ոչ թե երկրի գործող նախագահ Նիկոլաս Մադուրոյին, որն արդեն հայտարարել է իր վերընտրվելու մասին, այլ ընդդիմության միասնական թեկնածու Էդմունդո Գոնսալեսին, գրում է BBC-ի ռուսական ծառայությունը։

Հինգշաբթի ուշ երեկոյան հրապարակված հայտարարության մեջ Պետքարտուղարության ղեկավարը հիշեցրել է, որ Վենեսուելայի Ազգային ընտրական խորհուրդը չի հրապարակել հուլիսի 28-ի ընտրությունների մանրամասն արդյունքները, իսկ ընդդիմության կողմից հրապարակվածները վկայում են Գոնսալեսի հաղթանակի մասին:

«Ժողովրդավարական ընդդիմությունը հրապարակել է արձանագրությունների ավելի քան 80%-ը, որոնք ստացվել են ուղղակիորեն Վենեսուելայի ընտրատեղամասերից։ Եվ այս գրառումները ցույց են տալիս, որ Էդմունդո Գոնսալես Ուրուտիան ստացել է ձայների մեծամասնությունը այս ընտրություններում»,- ասվում է Բլինքենի հայտարարության մեջ:

Նույնն են վկայում exit poll-ի տվյալները և օտարերկրյա դիտորդների զեկույցները, ընդգծել է պետքարտուղարը։

«Ընտրություններից ի վեր մենք լայնորեն խորհրդակցել ենք գործընկերների և դաշնակիցների հետ ամբողջ աշխարհում: Եվ չնայած տարբեր երկրներ տարբեր մոտեցումներ ունեն արձագանքելու հարցում, նրանցից ոչ մեկը չի հասկանում, թե ինչպես Նիկոլաս Մադուրոն կարող էր ստանալ ձայների մեծամասնությունը»,- հավելել է Բլինքենը:

Պետքարտուղարը Գոնսալեսին ուղղակիորեն չի անվանել Վենեսուելայի նախագահ, այլ շնորհավորել է նրան «հաջող քարոզարշավի համար» և կոչ արել վենեսուելական կողմերին բանակցություններ սկսել երկրի պատշաճ կերպով ընտրված նախագահին իշխանությունը խաղաղ փոխանցելու համար։

Միևնույն ժամանակ, Վենեսուելայի հարևան երկրների՝ Բրազիլիայի, Մեքսիկայի և Կոլումբիայի նախագահները կոչ են արել Կարակասին դեռևս հրապարակել անցած կիրակի քվեարկության մանրամասն արդյունքները, որոնցում պետության ներկայիս ղեկավար Նիկոլաս Մադուրոն իրեն հաղթող է հայտարարել։ Երեք երկրներն էլ հայտարարել են, որ պատրաստ են օգնել ստեղծված իրավիճակի հանգուցալուծմանը և կոչ են արել ամեն ինչ անել՝ բռնությունից խուսափելու համար։

Իրավապաշտպանների տվյալներով՝ Վենեսուելայում արդեն առնվազն 11 մարդ է զոհվել ցուցարարների և ոստիկանության միջև բախումների ընթացքում, որոնք շարունակվել են ամբողջ շաբաթվա ընթացքում։