Խորապես ներգրավված ենք․ԱՄՆ Պետդեպը՝ Բաքվում պահվող հայ ռազմագերիների ազատ արձակման մասին

ԱՄՆ-ն շարունակում է խորապես ներգրավված մնալ Ադրբեջանում պահվող հայ գերիներին խնդրին։ Այս մասին ասել է ԱՄՆ Պետքարտուղարության պաշտոնական ներկայացուցչի տեղակալ Վեդանտ Պատելը ճեպազրույցում՝ անդրադառնալով դիտարկմանը որ արդեն չորս տարի է, ինչ հայ ռազմագերիները գտնվում են Ադրբեջանի բանտերում, և մոտ մեկ տարի է՝ այնտեղ են Լեռնային Ղարաբաղից հայ քաղաքական գործիչներ։ Freedom House-ի տվյալներով էլ՝ Ղարաբաղի տարածքն Ադրբեջանի վերահսկողության տակ անցնելուց հետո  դարձել է ամենաանազատ տարածքն աշխարհում՝ ավելի վատ, քան Հյուսիսային Կորեան, Վենեսուելան, Սիրիան, Աֆղանստանը։

Հարցին, թե արդյոք Վաշինգտոնը հետևում է իրավիճակին Լեռնային Ղարաբաղում ազատությունների և քաղաքացիական հասարակության փլուզմանը, և կա՞ արդյոք որևէ բան, որ ԱՄՆ վարչակազմը կարող է անել՝ օգնելու Ադրբեջանում բանտարկված հայերին, նրանց ազատ արձակել կամ այլ կերպ օգնել, Պատելը հայտարարել է․

«Հարավային Կովկասի ավելի լայն իրավիճակի համատեքստում սա մի բան է, որին պետքարտուղարը և գերատեսչությունը շարունակում են խորապես ներգրավված լինել: Ես ձեզ համար թարմացումներ չունեմ, քանի որ դա վերաբերում է այդ գործընթացին: Տեսեք, երբ խոսքը վերաբերում է ձերբակալվածներին, մենք հստակ և հետևողական ենք եղել, որ ցանկացած երկիր պետք է բոլոր  ձերբակալվածներին վերաբերվի մարդկայնորեն, արժանապատվորեն և միջազգային իրավունքին համապատասխան, և պետք է հարգի  նրանց մարդու իրավունքները, և դա շարունակում է ճիշտ լինել  այս դեպքում ևս»։