Թուրքիայի իշխանությունները հիմա էլ քաղաքներից հեռացնում են քրդերենով ճանապարհային նշանները

Վերջին մեկ ամսվա ընթացքում Թուրքիայի մի շարք քաղաքներում իշխանությունները հանել են քրդերենով ճանապարհային նշանները: Դրանք տեղադրվել են քրդամետ Ժողովուրդների ժողովրդավարություն և հավասարություն կուսակցության (DEM) կողմից վերահսկվող քաղաքապետարանների կողմից։ «Hêdî» (Դանդաղ) և «Peşî Peya» (Առաջինը հետիոտները) նախազգուշացումները տեղադրվել էին անցուղիների վրա՝ համահունչ նահանգների քուրդ մեծամասնության բնակչությանը, գրում են թուրքական լրատվամիջոցները։

Քրդաբնակ Վան, Դիարբեքիր և Բաթման քաղաքներում նման գործողություններից հետո ցուցանակները հանվել են նաև Մարդինի Դարգեչիթ և Նուսայբին շրջաններում։

Վանում և Դիարբեքիրում ցուցանակներն ի սկզբանե վանդալիզմի են ենթարկվել ազգայնական խմբի կողմից, որը դրանք փոխարինել է «Թուրքիան թուրքերինն է և կմնա թուրքական» կարգախոսով։

Մարդինում ևս դրանք ծածկել են ներկով։ Քաղաքապետարանը դժգոհություն է հայտնել այդ կապակցությամբ և վերահաստատել բազմալեզու հասարակությունը խթանելու իր հանձնառությունը:

«Մենք հավատարիմ ենք բազմալեզու հասարակությունը խթանելուն և քրդերենը թուրքերենի հետ միասին ներառել ենք քաղաքի ճանապարհային նախազգուշացնող նշաններում՝ դրանց արդյունավետությունն ու մատչելիությունը բարելավելու համար»,- ասվում է Մարդինի քաղաքապետարանի հայտարարության մեջ:

Նշվում է, որ այս ջանքերը լավ են ընդունվել տեղի բնակչության կողմից, սակայն բախվել են նրանց արձագանքին, որոնք դեմ էին տարածաշրջանի մշակութային հարստությանը և փորձում են համայնքն օտարել իր լեզվից և մշակույթից:

«Մեր քրդախոս քաղաքացիների առօրյան հեշտացնելուն ուղղված նման գործողությունները համայնքային ուղղվածություն ունեցող մեր մոտեցման առաջնահերթություններից են։ Մենք դատապարտում ենք այս հարձակումը մեր բազմալեզու ջանքերի վրա և կոչ ենք անում դատական ​​իշխանություններին ու տեղական հասարակական կազմակերպություններին՝ անդրադառնալ այս խնդրին: Մենք կօգտագործենք բոլոր օրինական միջոցները մեր քաղաքի հարուստ մշակութային հյուսվածքը պաշտպանելու համար»,- նշվում է հայտարարությունում։

Հավելենք նաև, որ Թուրքիայում վերջին շաբաթների ընթացքում ոստիկանությունն ամբողջ երկրում ձերբակալել և կալանավորել է տասնյակ քրդերի հարսանիքների ժամանակ և դրանից հետո՝ նրանց մեղադրելով «ահաբեկչական քարոզչություն» անելու համար՝ երգերի և վանկարկած կարգախոսների պատճառով։

Էմմա Չոբանյան