30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Դրական քայլ է․ ԱՄՆ Պետդեպը ողջունել է Հայաստանի և Թուրքիայի ներկայացուցիչների հանդիպումը
Քաղաքականություն
01.08.2024 | 17:38
ԱՄՆ-ը ողջունել է Հայաստանի և Թուրքիայի հատուկ ներկայացուցիչներ Ռուբեն Ռուբինյանի ու Սերդար Քըլըչի հանդիպումը երկու երկրների սահմանին՝ հարաբերությունների կարգավորման շուրջ բանակցություններն անվանելով «դրական քայլ Հարավային Կովկասում խաղաղություն և կայունություն հաստատելու համար»:
«Մենք ողջունում ենք այս հանդիպումը: Միացյալ Նահանգները Թուրքիա-Հայաստան հարաբերությունների կարգավորումը դրական քայլ է համարում Հարավային Կովկասում խաղաղություն և կայունություն հաստատելու համար»,- թուրքական Անադոլու գործակալությանն ասել է Պետքարտուղարության խոսնակը։
«Հայաստանը և Ադրբեջանը շարունակում են զգալի առաջընթաց գրանցել խաղաղության համաձայնագրի վերջնականացման ուղղությամբ, և մենք հավատարիմ ենք այդ գործընթացին աջակցելուն: Հիմա խաղաղության ժամանակն է»,- հավելել է նա։
Հուլիսի 30-ին հայ-թուրքական սահմանին տեղի է ունեցել Հայաստանի ու Թուրքիայի կարգավորման գործընթացի հատուկ ներկայացուցիչներ Ռուբեն Ռուբինյանի և Սերդար Քըլըչի հանդիպումը։ Հաղորդվել էր, որ կողմերը կրկին ընդգծել են իրենց հանձնառությունը՝ շարունակելու կարգավորման գործընթացը առանց որևէ նախապայմանի՝ երկու երկրների միջև լիարժեք կարգավորման վերջնական նպատակին հասնելու համար։
