Մեծ Բրիտանիայի Եվրոպայի, Հյուսիսային Ամերիկայի և անդրծովյան տարածքների հարցերով պետնախարար Սթիվեն Դոութին ողջունել է Հայաստանի և Թուրքիայի հատուկ ներկայացուցիչներ Ռուբեն Ռուբինյանի ու Սերդար Քըլըչի միջև հուլիսի 30-ին տեղի ունեցած հանդիպումը։
«Ողջունում եմ Հայաստանի և Թուրքիայի հատուկ ներկայացուցիչների հանդիպումը հայ-թուրքական սահմանին։ Սա կարևոր և դրական քայլ է երկու երկրների միջև լիարժեք կարգավորման և ավելի լայն տարածաշրջանում կայունության ուղղությամբ»,- գրել է Դոութին X-ի իր միկրոբլոգում։
Հիշեցնենք, որ հուլիսի 30-ին հայ-թուրքական սահմանին տեղի է ունեցել Հայաստանի ու Թուրքիայի կարգավորման գործընթացի հատուկ ներկայացուցիչներ Ռուբեն Ռուբինյանի և Սերդար Քըլըչի հանդիպումը։ Հաղորդվել էր, որ կողմերը կրկին ընդգծել են իրենց հանձնառությունը՝ շարունակելու կարգավորման գործընթացը առանց որևէ նախապայմանի՝ երկու երկրների միջև լիարժեք կարգավորման վերջնական նպատակին հասնելու համար։
