14.12.2025 | 19:26
Մրգի խանութի սեփականատերը զինաթափել է Սիդնեյի լողափին մարդկանց վրա կրակողներից մեկին
Մոլդովան արտաքսում է ՌԴ դեսպանատան աշխատակցին
Քաղաքականություն
01.08.2024 | 14:04
Մոլդովայի ԱԳՆ-ն պերսոնա նոն գրատա (անցանկալի անձ) է հայտարարել ՌԴ դեսպանատան աշխատակցին։ Այս մասին գերատեսչությունը տեղեկացրել է Քիշնևում ՌԴ դեսպան Օլեգ Վասնեցովին, գրում է Current time-ը։
«Արտաքսման որոշումը կայացվել է անցկացված միջոցառումներից հետո, որոնք հնարավորություն են տվել տեղեկություններ և ապացույցներ հավաքել այն մասին, որ ռուս դիվանագետը Մոլդովայի տարածքում իրականացրել է գործողություններ, որոնք անհամատեղելի են եղել նրա դիվանագիտական կարգավիճակի հետ»,- ասվում է հաղորդագրության մեջ։
Ռուսաստանի դեսպանատան անցանկալի անձ հայտարարված աշխատակիցը պետք է լքի երկիրը։ TV8-ի փոխանցմամբ՝ նա դիվանագիտական առաքելության ռազմական կցորդն է։
Նախօրեին էլ Մոլդովայում պետական դավաճանության և դավադրության կասկածանքով խորհրդարանի աշխատակից և սահմանապահ ոստիկանության ներկայացուցիչ է ձերբակալվել։«Ազատություն» ռադիոկայանը գրել էր, որ հետաքննություն է անցկացվում, մասնավորապես, Մոլդովայի խորհրդարանի իրավաբանական բաժնի ղեկավար Իոն Կրյանգեի նկատմամբ։ Նրան բռնել են Քիշնևում ՌԴ դեսպանատան աշխատակիցներին տեղեկություն փոխանցելիս։
Մոլդովայի նախագահ Մայա Սանդուն հայտարարել է, որ դավաճանության մեջ մեղադրվող քաղաքացիները պետք է պատժվեն օրենքի ողջ խստությամբ։ Նա չի պատասխանել հարցին, թե ինչ միջոցներ են ձեռնարկվելու ՌԴ դեսպանատան նկատմամբ։
