ՌԴ-ի և ԱՄՆ-ի միջև գերիների փոխանակման ժամանակ օգտագործված ինքնաթիռը վայրէջք է կատարել Կալինինգրադում

Օգոստոսի 1-ի առավոտյան Մոսկվայից Կալինինգրադ է մեկնել «Ռոսիա» թռիչքային ջոկատի Ան-148 ինքնաթիռը, որը նախկինում օգտագործվում էր Արևմուտքի հետ գերիների փոխանակման համար, գրում է The Moscow Times-ը։

ՏԱՍՍ-ը, վկայակոչելով FlightRadar-ի տվյալները, գրում է, որ RA-61727 համարով ինքնաթիռը, որը 2022 թվականին օգտագործվել է Վիկտոր Բուտի և ամերիկացի բասկետբոլիստ Բրիթնի Գրեյների փոխանակման համար, վայրէջք է կատարել Կալինինգրադի օդանավակայանում տեղական ժամանակով ժամը 07:35-ին, իսկ երկու ժամ անց վերադարձել Մոսկվա:

Ընդհանուր առմամբ, 20-ից 30 ռուս քաղբանտարկյալներ և լրագրողներ կարող են ներառվել գերիների փոխանակման գործընթացում, նախօրեին The Moscow Times-ին հայտնել է իրավիճակին ծանոթ աղբյուրը։ Փոխարենը Ռուսաստանը նախատեսում է հետ ստանալ իր գործակալներին և հետախույզներին, որոնք բանտարկված են Արևմուտքում:

Փոխանակումը, հավանաբար, տեղի է ունեցել Լեհաստանի սահմանին, գրում է First Department-ը։ Դրա հավանական թեկնածուներն են Ալեքսեյ Նավալնիի Հակակոռուպցիոն հիմնադրամի (FBK) հետ կապված մարդիկ, ԱՄՆ քաղաքացիներ և մի խումբ ռուսներ, որոնք դատապարտվել են ռազմական կեղծիքների համար:

Նրանց թվում են ընդդիմադիրներ Վլադիմիր Կարա-Մուրզան և Իլյա Յաշինը, ինչպես նաև Wall Street Journal-ի լրագրող Էվան Գերշկովիչը, որը դատապարտվել է լրտեսության համար, The Moscow Times-ին հայտնել է աղբյուրը։

16 տարվա ազատազրկման դատապարտված Գերշկովիչը, ամենայն հավանականությամբ, հինգշաբթի կվերադառնա Միացյալ Նահանգներ՝ բանտարկյալների փոխանակման շրջանակներում, հաղորդում է Fox News-ը՝ հղում անելով իր աղբյուրներին։

Փոխարենը Ռուսաստանը կարող է ստանալ Ալեքսանդր Վիննիկին, Վլադիսլավ Կլյուշինին, Վադիմ Կոնոշչենկոյին և Մաքսիմ Մարչենկոյին։ Նախօրեին նրանց մասին տեղեկատվությունը անհետացել էր ԱՄՆ բանտերի դաշնային բյուրոյի հանրային էլեկտրոնային տվյալների բազայից, ինչը հնարավորություն է տալիս որոշել բանտարկյալների պահման վայրը, նշում է ՏԱՍՍ-ը։