Նիկոլ Փաշինյանից ու Արթուր Բաղդասարյանից բացի այլ քաղաքական գործիչ չկա, որը վիրտուալ դաշտում խոսում է ժողովրդի հետ՝ լսարան հավաքելով. Մհեր Շահգելդյան. ՏԵՍԱՆՅՈՒԹ

Երևանի ավագանու ընտրություններին «Օրինաց երկիր» կուսակցության ցուցակը գլխավորող Մհեր Շահգելդյանը Factor.am-ի հետ զրույցում համոզմունք հայտնեց, որ հեղափոխությունից հետո  սպասվում են մաքուր ընտրություններ՝ առանց ընտրակաշառքի և վարչական ռեսուրսի կիրառման:

«Սրանք կարևոր ընտրություններ են լինելու, չմոռանանք, որ Երևանը Հայաստանի 40 տոկոսն է և լրջագույն նշանակություն ունի: Այս տեսանկյունից դաշտ է բացվում Երևանը բարեփոխելու և երևանցու կյանքը բարելավելու համար»,- նշեց ՄՀեր Շահգելդյանը:

Քաղաքապետի թեկնածուն պնդեց, որ լուրջ հավակնություններ ունեն և համոզված են՝ մրցակցությունը լինելու է ծրագրերի շուրջ:

«ՕԵԿ-ը ներկայացրել է 116 հոգանոց ցուցակ, շատերը երիտասարդներ են, և նրանք եկել են, որովհետև համոզված են «Օրինաց երկրի» գաղափարների արդյունավետությանը: Մարդիկ հավատում են և գալիս են մեր կուսակցության շարքեր, սա կարևոր ցուցանիշ է: Երկրորդ կարևոր ցուցանիշը, որի մասին մենք բազմիցս  խոսել ենք հետևյալն է՝ քաղաքական կյանքի մի հիմնական հատված վիրտուալ իրականության մեջ է՝ ինտերնետ, «Ֆեյսբուք»: Արթուր Բաղդասարյանի «լայվերը» դիտում են 300-350 հազար մարդ: Սրանք մեծ թվեր են: Այսօր, ըստ էության, Նիկոլ Փաշինյանից ու Արթուր Բաղդասարյանից բացի այլ քաղաքական գործիչ չկա, որը վիրտուալ դաշտում խոսում է ժողովրդի հետ՝ լսարան հավաքելով»,- շարունակեց Շահգելդյանը:

ՕԵԿ-ի կողմից առաջադրված քաղաքապետի թեկնածուն կտրուկ հերքեց մամուլում շրջանառվող լուրերը, որ այժմ էլ ՕԵԿ-ը մուրաբայի փոխարեն ուսման վարձերի զեղչեր է խոստանում՝ Երևանի ավագանու ընտրություններին քվե ստանալու համար:

«Սկսել են նորից սև PR անել,  բացարձակ իրականությանը չի համապատասխանում: Ուսման վարձերը որոշվում են կիսամյակից հետո, ի՞նչ կապ ունի այս ընտրությունների հետ»,- տարակուսանք հայտնեց Մհեր Շահգելդյանը՝ այդպես էլ չհստակեցնելով, թե ինչ ուժեր են փորձում ՕԵԿ-ին վարկաբեկող քայլերի դիմել:

Հարցազրույցն ամբողջությամբ՝ տեսանյութում:

Շողիկ Գալստյան