06.04.2026 | 13:58
Ուկրաինական ԱԹՍ-ները հարձակվել են Կրասնոդարի մարզի վրա
Ալիևի ներկայացուցիչն ամերիկացի պաշտոնյաների հետ քննարկել է Հայաստանի հետ խաղաղության գործընթացը
Քաղաքականություն
01.08.2024 | 11:44
Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովը ԱՄՆ կատարած այցի շրջանակում հանդիպումներ է ունեցել ամերիկացի մի շարք պաշտոնյաների հետ, մտքեր են փոխանակվել Ադրբեջանի և Հայաստանի միջև խաղաղության գործընթացի, ինչպես նաև Վաշինգտոնի ու Բաքվի հարաբերությունների վերաբերյալ։ Այս մասին հայտնում են ԱՄՆ-ում Ադրբեջանի դեսպանատունը և ՄԱԿ-ում Ադրբեջանի մշտական ներկայացուցչությունը։
«Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովը ԱՄՆ աշխատանքային այցի շրջանակում Սպիտակ տան Ազգային անվտանգության խորհրդի եվրոպական հարցերով ավագ տնօրեն Մայքլ Քարփենթերի, պետքարտուղարի Եվրոպայի ու Եվրասիայի հարցերով օգնական Ջեյմս Օ՛Բրայենի, Եվրոպայի ու Եվրասիայի հարցերով պետքարտուղարի առաջին տեղակալ Յուրի Քիմի, Պետքարտուղարության Հարավային և Կենտրոնական Ասիայի գործերի բյուրոյում Կենտրոնական Ասիայի հարցերով գրասենյակի տնօրեն, պաշտպանության փոխնախարարի օգնական Լորա Կուպերի և Նեբրասկայից հանրապետական սենատոր Փիթ Ռիքեթսի հետ հանդիպումներում անցկացվել են կառուցողական ու օգտակար քննարկումներ, որոնք ընդգրկել են ադրբեջանա-ամերիկյան համագործակցության երկկողմ օրակարգը, Ադրբեջանի և Հայաստանի միջև խաղաղության գործընթացի ներկա վիճակը, ինչպես նաև տարածաշրջանում վերջին զարգացումները»,- ասվում է հայտարարության մեջ։
Մեկ այլ հաղորդագրությամբ էլ նշվում է, որ Ամիրբեկովը հանդիպել է հայտնի վերլուծական կենտրոնների ներկայացուցիչների հետ ԱՄՆ Խաղաղության ինստիտուտի կողմից կազմակերպված կլոր սեղանի ժամանակ։
«Միջոցառման ընթացքում քննարկվել են Ադրբեջանի և ԱՄՆ-ի հարաբերությունները, Ադրբեջանի և Հայաստանի միջև ընթացող խաղաղության գործընթացի ներկա վիճակը և հեռանկարները, տարածաշրջանային և միջազգային անվտանգության հարցեր»,- ասվում է հայտարարությունում։
Բացի այդ, Ալիևի ներկայացուցիչը Նյու Յորք կատարած աշխատանքային այցի շրջանակում հանդիպել է Քաղաքական հարցերով համաշխարհային կազմակերպության գլխավոր քարտուղարի տեղակալ Ռոզմարի Դիկարլոյի հետ՝ քննարկելով Ադրբեջանի և Հայաստանի միջև խաղաղության գործընթացի ներկա վիճակը, հեռանկարները, ինչպես նաև տարածաշրջանում վերջին իրադարձությունները:
