Ռուս սահմանապահները «Զվարթնոց» օդանավակայանից հեռանում են. արձանագրություն է ստորագրվել

Երևանի «Զվարթնոց» օդանավակայանում այսօր՝ հուլիսի 31-ին, տեղի է ունեցել «Զվարթնոց» օդային անցակետում պետական ​​սահմանի պահպանության ներքո հայկական կողմին հանձնելու մասին արձանագրության ստորագրումը։ Այս մասին հայտնում է NEWS.am-ը։  Արձանագրությունը ստորագրել են Հայաստանի ԱԱԾ սահմանապահ զորքերի հրամանատար Էդգար Հունանյանը և Հայաստանում ՌԴ ԱԴԾ Սահմանապահ վարչության պետ, գեներալ-լեյտենանտ Ռոման Գոլուբիցկին։

Արձանագրությունում նշվում է, որ «Հայկական կողմը շնորհակալություն է հայտնում ռուսական կողմին «Զվարթնոց» օդային անցակետում սահմանային հսկողություն ապահովելու երկարաժամկետ համատեղ ծառայության համար և նշում է, որ ռուսական կողմի նկատմամբ որևէ պահանջ չունի»։

Factor.am-ը ավելի վաղ տեղեկացրել էր, որ Երևանի «Զվարթնոց» միջազգային օդանավակայանից ռուս սահմանապահները հեռացվելու են։

Հիշեցնենք, որ ս․թ․մարտի 12-ին տեղի ունեցած ասուլիսի ընթացքում ՀՀ վարչապետ Նիկոլ Փաշինյանը հաստատել էր՝ Հայաստանի սահմանապահ զորքերը դիմել են Ռուսաստանի սահմանապահ ծառայությանը, շնորհակալություն են հայտնել «Զվարթնոցում» ծառայություն իրականացնելու համար և տեղեկացրել, որ արդեն «բավարար փորձ և հմտություն են ձեռք բերել, որպեսզի օդանավակայանում սահմանապահ հսկողությունն իրականացնեն առանց ռուսական կողմի աջակցության»։

Երևանը, ըստ Փաշինյանի, ոչ թե դիմել, այլ տեղեկացրել է ռուսական կողմին այդ որոշման մասին․

«Այնտեղ նշված ժամկետը 2024 թվականի օգոստոսի 1-ն է։ Օգոստոսի 1-ից մենք ծառայությունը ինքնուրույն կիրականցնենք»։

Նշեբք, նաև, որ 1992 թվականի սեպտեմբերի 30-ին Երևանն ու Մոսկվան կնքել էին «ՀՀ տարածքում գտնվող ՌԴ սահմանապահ զորքերի կարգավիճակի ու նրանց գործունեության պայմանների մասին» պայմանագիրը։

Պայմանագրով Հայաստանը ռուսական սահմանապահ զորքերին թույլատրում էր ժամանակավորապես վերահսկել Թուրքիայի և Իրանի հետ պետական սահմանները։

Պայմանագրի 4-րդ հոդվածի 4-րդ կետով նախատեսվում էր, որ Հայաստանը սեփական սահմանապահ ստորաբաժանումների ստեղծմանը զուգահեռ պետք է իր պահպանության տակ վերցներ իր արևմտյան ու հարավային սահմանների վերահսկողությունը։