11.01.2025 | 16:59
Երևանի 2 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Փարիզ-2024. Ուրախ եմ, որ պայքարել եմ մինչև վերջ. Էլմիրա Կարապետյան
31.07.2024 | 14:39
Հայաստանի օլիմպիական հավաքականի անդամ, հրաձիգ Էլմիրա Կարապետյանն ամփոփել է Փարիզ-2024-ում իր ելույթը:
«Չեմ կարծում, որ իմ ելույթի ժամանակ ինչ-որ մի բան չի ստացվել: Այդ օրը այդպես ստացվեց: Իրականում մեծ սխալ չի եղել: Ամբողջ մրցման ժամանակ հստակ տեսել եմ իմ անցած ճանապարհը: Ուրախ եմ, որ պայքարել եմ մինչև վերջ, և այդ պայքարն ուժ է տալու հետագայում մարզվելու համար, որպեսզի ավելի բարելավեմ արդյունքս, և որ մեկ միավորը չխանգարի եզրափակիչ անցնելուն»,- «Արմենպրես»-ի թղթակցի հետ զրույցում ասաց Կարապետյանը:
Վերջինս անդրադարձավ նաև հայկական սպորտի համար բացառիկ համարվող օլիմպիական ջահի փոխանցումավազքին իր մասնակցությանն` ընդգծելով, որ բառերով անհնար է փոխանցել այդ էմոցիաներն ու երջանիկ պահերը:
«Ֆանտաստիկ հնարավորություն էր, առավել ֆանտաստիկ զգացողություններ եմ ունեցել ջահով քայլելիս: Ամբողջ մարմինդ փշաքաղվում է, երբ ձեռքիդ այդ օլիմպիական ջահն է: Լինելով առաջին հայ աղջիկն, ով օլիմպիական ջահով վազել է՝ շատերի համար ոգեշնչման աղբյուր ես դառնում: Շատ են ինձ գրում այդ մասին»,-առանձնացրեց Կարապետյանը:
Հայաստանի օլիմպիական հավաքականի անդամ, հրաձիգ Էլմիրա Կարապետյանը Օլիմպիական խաղերում չհաղթահարեց որակավորման փուլի արգելքը: 33-րդ ամառային Օլիմպիական խաղերի 10 մետր ատրճանակ 60 կրակոց ձևում Կարապետյանը 576 միավորով գրավեց 9-րդ տեղը: Հայ հրաձիգին միայն մեկ միավոր չբավարարեց եզրափակիչ դուրս գալու համար: Փարիզ-2024-ը Կարապետյանի երկրորդ Օլիմպիական խաղերն են:
