ԱՄՆ-ի ճնշմամբ է Ռուբինյան-Քըլըչ հանդիպումը կայացել․ ՀՀ-Թուրքիա կարգավորումը ամերիկյան շահերից է՝ ՌԴ-ի կարիքը չի լինի․ Արսեն Խառատյան. ՏԵՍԱՆՅՈՒԹ

Այսօր Մարգարայի անցակետում հանդիպեցին հայ և թուրք բանագնացներ Ռուբեն Ռուբինյանը և Սերդար Քըլըչը։ Ըստ ՀՀ ԱԳՆ-ի՝ պայմանավորվել են տարածաշրջանային զարգացումներին համապատասխան գնահատել տեխնիկական կարիքները, որոնք հնարավորություն կընձեռեն գործարկել Ախուրիկ/Աքյաքա երկաթուղու սահմանային անցակետը, ինչպես նաև փոխադարձաբար դյուրացնել վիզայի ընթացակարգերը դիվանագիտական/պաշտոնական անձնագրեր ունեցողների համար։ Նրանք ընդգծել են կարգավորման գործընթացն առանց որևէ նախապայմանի շարունակելու պայմանավորվածությունը՝ երկու երկրների միջև լիարժեք կարգավորման վերջնական նպատակին հասնելու համար, վերահաստատել են նախորդ հանդիպումների ընթացքում ձեռք բերված պայմանավորվածությունները։ Ոչ մի կոնկրետ լուծում, ինչո՞ւ չի բացվում սահմանը։

«Ալիք Մեդիա» լրատվական-վերլուծական կայքի հիմնադիր Արսեն Խառատյանը Factor TV-ի հետ զրույցում դրական է որակում այս հանդիպման փաստը՝ հաշվի առնելով, որ շուրջ 10 ամիս հանդիպում չէր եղել․

«Բոլորին է պարզ և ակնհայտ, որ գնդակը Թուրքիայի դաշտում է։ Թուրքական կողմը դեռ անցյալ հոկտեմբերին կարող էր այս ամենը իրականացրած լինել։ Հիմա կարծես թե հաստատվում է նախկինում ձեռք բերված պայմանավորվածությունը՝ երրորդ երկրների քաղաքացիների և դիվանագիտական անձնագիր ունեցողների տեղաշարժի վերաբերյալ, և նաև՝ կոնկրետացվում է, թե դա որ հատվածում է տեղի ունենալու։ Սա առաջընթաց է, բայց գաղտնիք չէ, որ թուրքական կողմը իր հարաբերությունների կարգավորման գործընթացը շարունակում է կապել Ադրբեջանի հետ խաղաղության պայմանագրի կնքմանը։ Ինչ-որ իմաստով կարելի է ասել՝ թուրքական կողմը Ադրբեջանի գերին էր՝ այս ուղղությամբ առաջընթաց ապահովելու տեսանկյունից»,- նշեց պարոն Խառատյանը։

Նա համոզված է, որ ԱՄՆ-ի ճնշմամբ է Ռուբինյան-Քըլըչ հանդիպումը կայացել, և որ ՀՀ-Թուրքիա կարգավորումը ամերիկյան շահերից է, քանի որ ռեգիոնում կոնֆլիկտների վերացման հետևանքով ՌԴ-ի ներկայության կարիքը չի լինի։

Հարցազրույցն ամբողջությամբ՝ տեսանյութում։

Ռոբերտ Անանյան