Հունգարիան պարզեցրել է երկիր մուտքի պայմանները ռուսների և բելառուսների համար

Հունգարիայի իշխանությունները ռուսների և բելառուսների համար «առանց ավելորդ աղմուկի» պարզեցրել է երկիր  մուտքի պայմանները, գրում է DW-ի ռուսական ծառայությունը։

Այժմ Ռուսաստանի և Բելառուսի քաղաքացիներն ընդգրկված են, այսպես կոչված, «ազգային քարտ» ծրագրում (Հունգարիայում բնակության թույլտվության տեսակներից մեկը), որը թույլ է տալիս նրանց աշխատանք գտնել ցանկացած ոլորտում և իրենց հետ բերել ընտանիքին։

Նշվում է, որ որոշումը Հունգարիայի կառավարության կողմից ընդունվել է դեռևս հուլիսի սկզբին։ Նախկինում ծրագիրը վերաբերում էր միայն Սերբիայի և Ուկրաինայի քաղաքացիներին։ Հուլիսի 9-ից «ազգային քարտից» կարող են օգտվել Ռուսաստանի, Բելառուսի, Բոսնիա և Հերցեգովինայի, Մոլդովայի, Հյուսիսային Մակեդոնիայի և Չեռնոգորիայի քաղաքացիները։

«Ազգային քարտը» տրվում է երկու տարով և կարող է երկարաձգվել անսահմանափակ քանակությամբ: Երեք տարվա կեցությունից հետո քարտատերը կարող է պահանջել մշտական ​​բնակության թույլտվություն Հունգարիայում:

Ըստ RND-ի՝ սա Հունգարիայի հարևանների մոտ անհանգստություն է առաջացնում, որ լրտեսները կամ ահաբեկիչները կարող են այս կերպ ներթափանցել Եվրամիություն:

Եվրախորհրդարանի պատգամավոր Սերգեյ Լագոդինսկին լրատվամիջոցի հետ զրույցում հայտարարել է, որ Հունգարիայի վարչապետ Վիկտոր Օրբանը «խաթարում է եվրոպական միգրացիոն համակարգը, միևնույն ժամանակ, իրեն դարձնում Կրեմլի ծառան»։ Պատգամավորը նաև շեշտել է, որ սխալ է համարում «Ռուսաստանի բոլոր քաղաքացիներին խարանելը»։